Sa mataina le toe vaiaso o taaloga a le Bluesky Manuiti i Niu Sila, ma na molimauina le malosi o le malulu o le tau i Niu Sila ae sa vaaia pea le lolofi atu o le atunuu ina ia molimauina ma maimoaina toe taaloga a le Bluesky Manuiti.
O le ogatotonu o le vaiaso na feiloai ai le Manuiti ma le Kalapu a Waitemata ma manumalo ai i lea taaloga.
O se vaaiga faafiafiaina tele ona o le tomai o alo ma fanau i le faatinoina o le taaloga, mae‘a le taaloga i lea po toe taliu le malaga i Otahuhu i le nofoaga o loo faamautu ai e sauni ai i le toe taaloga ma le au filifilia a le Aukilani Samoa.
I le toe taaloga i le Aso Toonai na se‘i mavae atu na matuā vaaia ai le lē solomuli o le lagolago a Samoa i le toe taaloga. Sa vaaia foi i lea aso le Minisita o Aoga, Taaloga ma Aganuu mai Samoa e molimau le taualugaina o le malaga taamilo a le Bluesky Manuiti i Niu Sila, o se taaloga finau tele i ‘au uma e lua, e ui i le savili o lea aso ma le malulu, ae sa faataunuuina lava e aunoa ma se faalavelave na tulai mai i lea aso.
Ina ua mae‘a le taaloga ona faia foi lea o faaaloaloga masani mo ‘au uma e lua. Sa saunoa le Konesula o le Malo Samoa i Aukilani, le Afioga ia Faolotoi Reupena Pogi e faafetai le taualugaina o le taaloga aemaise le tulaga siitia ua molimauina nei i le tupulaga laiti i le taaloga o le lakapi, aemaise le Iuni lakapi a Aukilani Samoa i le lagalaga i atinae lelei faatasi ai ma le fuafuaga mamao a le Mao o Samoa i le tau atinaeina o le Lakapi i Samoa.
Na maua foi le avanoa o le Minisita o Aoga, Taaloga ma Aganuu le Afioga ia Magele Mauiliu Magele, e saunoa ai i le atinae ua amataina i tapenaga a le Malo o Samoa, i le tausaga a sau ua fuafua ai e malaga atu Aukilani Samoa e faataunuu lenei tauvaga faataaloga i Samoa. Ma ua saunia foi e le Aukilani Samoa i Niu Sila se Ipu e faia agai i ai lenei tauvaga i tausaga uma. Sa faatumulia le malae i lea aso ma molimauina ai foi faaaloaloga masani faasamoa mo le Minisita o Aoga, Taaloga ma Aganuu, afioga ia Magele Mauiliu Magele faatasi ai ma le Minisita Lagolago, le afioga ia Tuuu Anasii Leota sa auai e molimauina le taualugaina o taaloga a le Bluesky Manuiti mai Samoa. Ua faamoemoe o le taeao o le Aso Lua o le vaiaso nei e faamoemoe e toe taliu ai i Samoa le au masii mai a le Bluesky Manuiti.
I faaaloaloga faasamoa i lea aso, na avea ai Manuavaia Iese Vaoga ma tootoo o le aso i faaaloaloga faasamoa. E foliga mai o se atinae ua mautinoa nei o le a faaauauina pea i tausaga taitasi aemaise lava le atinaeina o le lakapi mo alo ma fanau Samoa.