E faamaoni le alofa, e tumau le alofa, e olioli le alofa. O le taimi na afatia ai si o tatou atunuu i Samoa i faiga sauā a le afā o Eveni, e lei nofonofo faasamasamanoa le mafutaga a Faifeau soofaatasi i Ueligitone, ae na galulue loa e saili se fofo mo le mafatia o Samoa. O galuega a le alofa ua moni, le alofa ua tumau, ma le alofa e olioli e fesoasoani. Ioe, e lē aogā le na o le tatalo ma le faapea ane, “Talofa e, Talofa e,” ae tāua galuega faatino i taimi faapenei.
O le taumafaiga sa faatino i totonu o le laumua e ala i le leitiofoni na faatinoina i soo se itumalo o Ueligitone, sa lagolagoina e le leitio o le Siufofoga o le Laumua, ma sa galulue uma i ai le mamalu o le atunuu i ekalesia eseese, aemaise o isi atumotu na lagolagoina lenei faamoemoe i le amataga o le tausaga nei.
O le Aso Lulu o le vaiaso nei o loo sauni atu ai le Afioga i le Taitaifono o le mafutaga soofaatasi a Ekalesia, le susuga i le Toeaina ia Rev Popo Su‘a, faapea le Afioga i le Taitaifono o le Itumalo o Ueligitone o le Ekalesia Perepereane, Rev Perema Leasi; o le failautusi o le Mafutaga Soofaatasi a Faifeau Samoa i Ueligitone, e momoli le meaalofa tupe e $50,000 tala Samoa mo le atunuu pele. O loo iai le faamoemoe e tuusa‘o lava i aiga ua mafatia i le afā mai le lisi a le Victim Support i Samoa.
Na lagolagoina tele foi e le Ekalesia aoao o le Perepereane i Niu Sila lenei sailiga tupe ma latou foai mai ai le meaalofa e $5000 (lima afe tala) mo lenei faamoemoe, e ala i le tusi talosaga a le susuga i le failautusi, ua atoa ai le limasefulu afe tala mo nai o tatou tagata mafatia.
E faapena foi le faafetai tele i le Mafutaga a Faifeau Samoa o Ekalesia Soofaatasi e tusa o le alofa faamaoni e faatino lenei fesoasoani. E faapena foi le faafetai tele i le Siufofoga o le Laumua i faasalalauga uma mo le leitiofoni, ma ia manuia pea a tou galuega uma.
Mo i latou uma na lafo maa i lenei taumafaiga, Ia saga faamanuia atu le Atua o le sosia atoatoa ma toe faatutumu ai kate ua gaogao ona o lo outou agalelei faaalia.
