O le vaiaso na tea nei na faatumulia ai e le aumaimoa ma kolisi eseese i le malae taalo i Newtown Park i taaloga tuufaatasi a aoga. Na vaaia le malolosi o tama ma teine taaalo ma sa faafiafiaina mātua, faiaoga ma i latou na maimoa ona o le taaalo i le agaga taalo e aunoa ma ni misa.
O tauvaga sa faia i le togi mamafa, tuuga tamoe, o le togi o le maa salafa, soka, m.m.f. O le tuufaatasia o togi o aoga taitasi na manumalo ai le kolisi a Sagata Patelesio (St Pats) i Kilbirnie, Ueligitone, ma o se tali fiafia mo tama aoga ona ua tauia lo latou toleni malosi mo taaloga uma na sauni i ai mo nei faatasiga.
Toe faamalolosi mo le isi tuufaatasiga ia toe maua foi le manumalo. Manatua e lē o le malo faalialia ae o le malo tausaafia i le amio pulea ma le usiusitai lelei e manaomia. Faafetai le tausinio, faamalo foi i faiaoga ma mātua i le galulue malosi mo nai alo i lo latou faamoemoe.
