O le aso 6 o Mati i le tausaga e 1923 na soifua mai ai le tina ia Faauiaotupu i nai ona māatua o Nonoa Aleli mai le afioaga o Lufilufi, ma si ona tina ia Fouvale Aleli mai Manu‘a.
O le molimau a le Tusi Sa, “Ia e ava i lou tamā ma lou tina, e faalevalevaina ai ou aso i le nuu ou te foaiina atu ia te oe.” O le soifua tulu‘i ma le faafualoaina, o le tautoga a le Atua mo i latou o ē ava ma mata‘u i mātua, faaaloalo ma tausi tuaa. I molimau ma saunoaga a nai ona alo, e mautinoa ai faiva alofilima tausi aiga o si o latou tuaa.
Na matuā faatumulia le malu o le Ekalesia Katoliko i le pitonuu o Broadmeadows i le Aso Toonai na mavae atu nei, i ana uo, o aumea mamae, o tauaiga aemaise o nai ona alo ma a latou fanau, ae tainane le paia o le aufaigaluega totofi a le Atua, faapea le mamalu o le valaaulia, ona o le fia molimauina ma patipatia o le aso faapitoa o le tina.
O le susuga i le Sea o le Sinoti a Melepone o le Ekalesia Metotisi, le susuga i le faafeagaiga ia Uato‘a Nonoa na taitaia le sauniga lotu, o le susuga i le faafeagaiga ia Penaia Te‘o o le Ekalesia Uniting na fofogaina le upu faamalosi mai le Tusi Paia, a o taputapuai le mamalu o isi o faafeagaiga sa auai.
Na mae‘a ona momoli mea i Matautu Sa, ona fofogaina lea o le molimau o le soifua o le tina e si ona alo matua le susuga ia Faalua Tomanogi, ona alo ai lea o le fofoga o le aso, le susuga ia Tuani Tomanogi i ona faiva masani, ma tali ai loa le sua i se taumafataga felanulanuai ma le matagofie na gaseseina e le auaunaga a Sam Ma Lona Catering mai le Setete o Kuiniselani, a o faasolo faafiafiaga ma pesepesega a le faili malosi le Mauga o Fao.
Na leai lava se vaega o le aga i fanua faa-Samoa e lei oo i ai faaaloaloga a le aiga alii, ona o pelega o tuaa sinasina. Na ta‘ape le fuamanusina ma le mama ua lomi ma le vaa ua goto ona o faaaloaloga faatupu, ua maualuga ai le viiga o le Tapaau sili o i le lagi.
Na momoli le agaga faafetai o le aiga alii ona o le lagolago ma le faaeaea o le aufaigaluega, aemaise o le paia lasilasi o Samoa na afifio atu e sapasapaia le aso soifua o si o latou tina.
Tau ina ia alofagia e le Atua le soifua o oe le tina Faauiaotupu Ta‘inau Tomanogi, tausia lou soifua e ona aao alofa. Manuia tele lou Aso Soifua.
Alofaaga mai ou aiga uma, o nai ou alo ma lau fanau atoa, paia o le aufaigaluega a le Atua, aemaise o au uo i Melepone ma tulimanu e fā o le lalolagi.
