O le tulai mai o faafitauli i le tau tuufaatasia o tupe mo le faatinoga o taamilosaga o taaloga i Samoa na toe laga i le faaiuga o le vaiaso ina ua agai le Asosi o Faipelega a Samoa e faatautaia lana taamilosaga o fusuaga i le vaega lea e lē o fufusu faapolofesa (amateur) faapea ai le vaega o fusuaga faapolofesa.
O le tupe na tauaao atu e le Faalapotopotoga o Petipetiga a Samoa le Samoa TAB e $5,000 tala ma o le aso lava lea na avatu ai foi e lea faalapotopotoga se tinoitupe e $50,000 tala auā le Iuni Lakapi a Samoa.
O le faanoanoaga na faalauiloa e le afioga Ale Vena, o le Asosi o Faipelega a Samoa ona e lē taitai lava seleni nei seleni mo le faatinoga o taamilosaga tāua nei e atiae ai lea foi taaloga ma ua tele ina ave le faamuamua i le lakapi ae lē lava ai le faasoa i isi Sosaiete ma faalapotopotoga o taaloga.
Ta‘ua e Ale Vena o le auai atu o ‘au mai i Niu Sila faapea ai Amerika Samoa ma Fiti i le taamilosaga lea o le Ipu a le Palemia na moomia ai lava se $12,000 tala mo pasese lava ia ae lē taulia ai le manaoga o le nonofo ai i Samoa lea sa saili lava foi le asosi mo isi fesoasoani e faatupe ai.
Na iu lava ina toe tusi Ale Vena i le Sportslotto e avatu le isi $7,000 ina ia mafai ai ona totogi pasese o i latou na malaga atu i lenei taamilosaga.
O le taamilosaga ina ua faatino i le faaiuga o le vaiaso na toe nofo ai le Ipu a le Palemia i Samoa ma o le taamilosaga lenei ua filifili ai ma i latou e tausinio i Taaloga a Malo o le Taupulega i lenei tausaga.
Ua alu le vaiaso o tālia se tali a le Faalapotopotoga o Petipetiga a Samoa ina ia aumai se vaevaega o tupe e faasafua atu i faalapotopotoga o taaloga eseese ae ona pau le faamatalaga ua aumai, o le itu lea e moomia lava le tele o le tupe e avatu i le lakapi ona o le tele o taamilosaga o loo taumafai e unai i lea faagatama.
O le molimau a Ale Vena o le fusuaga lava le avefu‘a sa iai a Samoa ae o le utiuti o le seleni maua ua mafua ai lava le faaletonu ma lē toe malosi le atinae o lenei taaloga i le atunuu.
E pei lava ona saunoa Ale, e lei faapa‘ole foi taumafaiga a le fanau ina ua faatino le taamilosaga o le Ipu a le Palemia lea la ua toe nofo ai i Samoa le Ipu o lea taamilosaga mo lenei foi tausaga.
