O loo tālia nei suesuega a le Ofisa o Leoleo i se faalavelave na tulai mai i le va o ni aiga i totonu o Laulii i le faaiuga o le vaiaso na tea nei.
O faamatalaga ua oo mai, o aiga e lua na vevesi ma iu ina pa‘ilima i le Aso Faraile, ua tele masina o agai i le faamasinoga o Fanua ma Suafa ona o tuaoi ma o fanua nei ua tuuaia i le faalavelave lenei.
E toatolu ni alii na faapea ona ave i le falemai ma taofia a o tau fai i ai togafitiga ona o le tulai mai o lenei feeseeseaiga. O se agaese na faapea ona ta‘ua e leoleo na faaaogā i lenei feeseeseaiga, ma o le faafetai o le leai o se tasi na maumau ai se soifua ae o loo faatautaia pea togafitiga i le taimi lenei.
O le faaaliga a leoleo o loo saili ma fesiligia uma i latou sa iai i le taimi o le faalavelave ma e lē o iai se isi ua molia i lenei faalavelave.
Na faafetaia foi e i latou na molimauina lenei vevesi le vave atu o le ofisa o Leoleo i lenei mataupu na semanu e tulai mai ai nisi tulaga ogaoga atu, ae o le oo atu o Leoleo na taofia ai loa le misa ma aumai faatopetope ai i latou na aafia i lenei mataupu.
