Talu mai le amataga o le fono faitulafono sa vaaia ai le tele o nofoa o palota taitoatasi sa faaigoaina e le lautele o le atunuu i tausaga ua mavae o le palota a afakasi. O le faagasolo mai ai o tausaga ua fai ma aveese nofoa nei o le Palemene ona ua toatele lava ua agai i le palota Samoa e faatino ai a latou faiga filifilfiga.
O taualumaga lea ua mae‘a mo le Tala Faatatau Autu o le Tupe a Samoa 2014/2015 lea na laga ai e le Alii Palemia le tuu atu loa o ni igoa taualoa mo nofoa e lua o loo totoe i le taimi lenei.
O le tulafono foi e pei ona molimauina i le faigapalota tele ua mae‘a na faamalosia ai le faia o suafa matai a sui tauva o le Palemene ua faapea ona ofi mai e fai ma sui a Faipule o nofoa nei e lua lea e tulai mai ai i le taimi lenei le susuga Papaliitele Niko Lee Hang ma le Afioga Maualaivao Pat Ah Him.
O suafa faatupu o le saunoaga lea a le Alii Palemia le susuga Tuilaepa Lupesoliai Sailele Malielegaoi i le Palemene.
O le talanoaina o teuteuga i le tulafono o faigapalota lea ua agai ai loa le Alii Palemia i le mataupu lenei o le suia o le igoa e ave i nofoa nei. Ua lē o toe faaigoaina ai o nofoa o palota taitoatasi ae o lea o le a iloa nei o Nofoa o le Palemene mo Itumalo faaalalafaga o le Taulaga.
“Ua tele tausaga o sau ai nei nofoa i nei igoa e lē taualoa ae o lea o le a sii le maualuga ma le amanaia o nei vaega o le atunuu i le va o ao,” o lana saunoaga lea i le Palemene.
“Silasila foi o le Papaliitele ma le Maualaivao, o suafa faatupu ae o lea e tulai mai i itumalo ua tuumaualalo i le silasila a le atunuu”.
O i latou o loo i le lola palota o itumalo nei e lua ua faapea ona aofia i palota taitoatasi ma o i latou nei e toatele lava i tagata e pei ona ta‘ua o afakasi aemaise o i latou ua nonofo i nofoaga e pei o Aleisa, o Sogi ma isi afioaga e pei o le Aai o Niue, Aai o Fiti, o Elise Fou o nofoaga o loo nofoia e i latou na faapea ona tuu atu nuu nei e faamautu ai ae o le latou tupuaga o tagatānuu mai i fafo.
O le fuafuaga lava ina ia avea augatupulaga ua nonofo ma ola i Samoa o nofoaga aloaia mo tagatānuu o Samoa ma o le mafuaaga lea o le taumafai lava o le Malo ina ia tafiesea nofoa poo palota taitoatasi i le lumanai ae agai uma i latou nei e palota i itumalo faaalalafaga e pei ona masani ai le tele o Samoa ae mo le taimi lenei ua na o igoa ia ua suia i le teuteuga o le tulafono.
Sa laga muamua foi le taumafaiga lea a le Malo e tafiesea nofoa nei o le Palemene peitai sa toatele lava i latou na tetee ona o le manatu e aogā foi nofoa nei e faafaigofie ai le latou faiga filifiliga ma o lea lava la e oo mai i le taimi nei e lua nofoa o le Palemene o Samoa ua patino tonu ia i latou e lē o agai lava e faia a latou palota faa-Samoa.
