O le vaiaso nei e tatau ona faatino ai le sainia e le taitai o le Malo o le feagaiga poo le Memorandum of Understnding le MOU ma le kamupani Amerika o le Bumble Bee, mo le fausia o se fale tele e faamama ai le i‘a a lea kamupani i lo tatou atunuu.
O le Aso Faraile na tea nei na faamoemoe e saini ai le feagaiga peitai e taunuu atu le tusitala o lenei lipoti mo le sainigalima i le ofisa o le Palemia, ae logo mai e se tusitala a le Malo i le nusipepa o le Savali le susuga Nanai Laveitiga Tuiletufuga, ua logoina e le Palemia ua toe taatia le faamoemoe i se aso o lenei vaiaso ona e faapea e iai ni vaega o le feagaiga e tatau ona toe polesi ma faaiila lelei ona faatoa saini ai lea.
Na maua ni molimau e faapea sa naunau le Palemia o Samoa e faatino le sainigalima ma le Bumble Bee i le taimi e taualuga ai talanoaga ma le va ma taitai o Amerika Samoa peitai e lei taunuu.
Fai mai se molimau na malaga mai i le usugafono a Tutuila ma Manu‘a e foliga sa manao le Palemia o le Malo tutoatasi e faapupula sui o le faigamalo i Sasa‘e o lea ua tino lava le faamoemoe sa moe miti i ai o se fale tuuapa i‘a aua o le kamupani o le starkist a Amerika Samoa na muamua savalia le Malo i ni tausaga ua mavae mo lea faamoemoe, ae peitai ua fiu lava e faatali e lei toe o mai nisi e faatino talanoaga sa faia ma faigamalo ua mavae.
E silia i le tasi le afe galuega o le a maua e tagata Samoa pe a taunuu le fuafuaga a le Bumble Bee mo lona fale e faamama ai le i‘a, ona tuuaisa lea ma lau i kamupani o loo tuuapa ai e pei o le Starkist i Amerika Samoa.
Ua ta‘ua e se molimau faatuatuaina o lea e foliga o le vave ona tino mai le faamoemoe ona o le tausaga nei lava e fausia ai le fale mo lea fuafuaga ae le o le tausaga fou e pei ona sa fuafuaina muamua e le pulega o le Bumble Bee.
O se fuafuaga lenei a le Malo ma lea kamupani ua naunau mai ai pe le starkist i Amerika Samoa e aumai apa tuna e faatau i Samoa ae o loo faatali pe mafai ona faia se faamama avega a le malo tutoatasi i le maualuga o le lafoga o le tiute. O lona uiga o se isi lea lasaga ua liliu i ai le kamupani tuuapa i‘a i Tutuila o loo toatele tagata o le tatou atunuu o loo faigaluega ai.
Manogi leaga mai le falei‘a
O se popolega lea na faaleo e le taitai o le Itu agai le afioga Palusalue Faapo II i taualumaga a le Palemene i le vaiaso ua mavae ona a faatu le fale e faamama ai le i‘a a le kamupani mai Amerika, o le a matua mafatia i latou e nonofo latalata i ai i le manogi.
O le manogi o loo sogitia ai fofoga o le toatele o loo malaga i Tutuila pe a pasia le fale i‘a i Atuu, o le ituaiga manogi lea o loo popole i ai le taitai o le Itu agai.
O le uafu i Matautu-tai i Apia o le a fausia ai le fale mo lea faamoemoe, ma o le itu mautinoa o se isi lea galuega a le Malo ia i latou o loo gafa ma le siosiomaga o le siakiina o vaega uma a o lei amatalia lea tautua fou ina ia leai se faaletonu e tulai mai e ono afaina ai le siosiomaga.
