O lupe sa vao eseese a ua fuifui faatasi, a o le pese a le faisalamo o Tavita, ‘Faauta o le mea ina lelei ma le matagofie lava, pe a nonofo faatasi lava o uso.’
O le mafutaga mafana lea sa toe vaaia i le faaiuga o le vaiaso ua mavae i totonu o le Ekalesia Faapotopotoga Samoa i Henderson, ina ua mafai ona toe maua le avanoa e faasoa ai ma taliē tamafanau a le ekalesia o loo galulue i totonu o isi tovine o le galuega a le Atua, faapea nisi o loo aumau i isi atunuu.
Ma o le manulauti foi lea sa faananau lava i ai le susuga i le faafeagaiga ia Rev Faamalua Peteru ma le faletua ia Ruta Peteru aemaise o le ekalesia, o le toe fia maua lea o se mafutaga ma i latou sa galulue i totonu o le lotu ma fofoa ai o latou soifua faaleagaga.
O le afiafi o le Aso Faraile, 27 o Iuni na amata faagasolo ai le polokalame o le faamanatuina o le atoaga o le 40 tausaga talu ona faavae mai le Ekalesia Faapotopotoga Samoa i Henderson. E tolu aso o lenei faamoemoe.
Na auai uma ai tamafanau o le ekalesia o loo galulue i isi tovine i totonu o Aotearoa nei faapea foi ma i latou na malaga mai i isi atunuu. Na tatala i le poloakalame a le autalavou i le po o le Aso Faraile, lea sa faatinoina ai le tele o a latou aitema.
O le Aso Toonai na faia ai loa le sauniga lotu faafetai i le Atua ona o nei tausaga e tele ua maua e le ekalesia. O le susuga lava i le faafeagaiga ia Rev Faamalua Peteru na taitaia le sauniga i lea taeao.
Na faafofoga foi le mamalu o le faapotopotoga i le tala otooto o le galuega mai lava i lona amataina seia oo mai i le taimi nei. Na maua foi le avanoa o le konesula, le afioga ia Faolotoi Fatialofa Reupena Pogi e fai ai lana saunoaga faafetai i le ekalesia i le onosai ma le faamaoni i le galuega a le Atua.
O le Aso Sa na faia ai loa le sauniga faaiu e tapunia ai lenei faamoemoe tāua. O le taitai o le susuga i le faafeagaiga ia Rev Alesana McCarthy, o le peseina o viiga o le Atua na lagiina lava e le aufaipese a le ekalesia.
O le faitauina o le afioga a le Atua na fofogaina lea e Rev Meaalofa Peteru. Sa maua foi le avanoa e faatinoina ai faaevagelia a le autalavou auā lava le taulaga faafetai i le Alii. O le laugaina o le Afioga a le Atua na saunia lava e le taitai o le sauniga, ma na faamalosi ai le faafeagaiga, “Le Ekalesia ala mai o loo iai le valaau a le Atua ia i tatou.”
Na faamae‘a le sauniga i le saunoaga faafetai a le faafeagaiga ia Rev Faamalua Peteru i le ekalesia e tusa ai ma le lē faalogologotiga i le galuega a le Atua. Na sosoo ma le taumafataga tele na faia lava i totonu o le maota o le matagaluega. O le fofoga o le aso, o le aao tusitusi o le ekalesia le susuga ia Lealali Leilua, ma o ia foi sa nafa ma faaaloaloga mo le mamalu o le auvalaaulia.
Tala Otooto o le Galuega
O le aso 2 o Mati i le tausaga e 1974 na faavaeina ai le lotu i Henderson, ma o le igoa sa faaigoaina ai o le Ekalesia Faapotopotoga Kerisiano i Samoa Henderson.
O le falesa Lotu Papatiso sa faia ai sauniga o le faavaeina o le lotu, ma faaauau ai lava sauniga i Aso Sa taitasi.
O Visetoka Peteru na taina pese o le sauniga i lea Aso Sa. E ono aiga na latou amataina le galuega, o le aiga o Finau ma Lulu Leleisiuao, aiga o Faatoatoa Viliamu Tapuai ma Iliui Slade, Trevor ma Vaoiva ma le fanau, Salaeima Lealaiauloto ma Jim Charlton ma le aiga, Sa ma Rongo Tuiavii ma le aiga ma Penetito ma Leata Tipi ma le fanau.
Na vave ona toe faaopoopo mai isi aiga fou ina ua uma ona faavae le lotu. O le aso 10 o Mati na uluai faia ai filifiliga o tofi o le ekalesia. O Faatoatoa Viliamu Slade o le uluai failautusi lea o le ekalesia, ma na maliu i le aso 25 o Aperila i le 1977, ona tofia lea o Faamalua Soti Leilua na te faaauauina le tofi seia mae‘a le palota a le ekalesia.
O le tausaga 1976 na faauuina ai loa le susuga i le faafeagaiga ia Rev Faamalua Peteru ma le faletua ia Ruta i le tofi faifeau e tausia le galuega i Henderson. O le 1974 – 1984, e 54 matafale faaopoopo, 1985 – 1994, e 5 aiga lotu na toe faaopoopo atu, ma le tausaga e 2005 – 2014, e 3 aiga ua toe faaopoopo.
Ma o matafale o loo galulue i le taimi nei e 44, faatasi ai ma aigalotu o loo galulue fesoasoani. E toe toatolu aiga na latou amataina le ekalesia o loo totoe mai i le taimi nei.
