O se feiloaiga i le fiafia na iai le faaiuga o le vaiaso ua mavae i sui faipule o le Pati o le National faatasi ai ma i latou o loo galulue i totonu o lenei vaega faaupufai o loo latou taitaiina le malo.
Na auai uma minisita o faipule faapea ma le aii Palemia ia John Key. O lenei feiloaiga o se fono e masani ai le National i tausaga taitasi e talanoina ai nisi vaega lelei auā le atinaeina o Niu Sila ma lana faigamalo. O le nofoaga i Bay of Island le mea sa saini ai le Treaty of Waitangi na faataunuuina ai lenei faamoemoe.
Na amata le fonotaga i le afiafi o le Aso Faraile lea sa feiloai ma faamasani ai tagata uma sa auai, ona sosoo lea ma le saunoaga a le afioga i le Minisita o tamaoaiga ia Steven Joyce e faalia ai polokalame faataatitia mo le isi 15 tausaga o lumanai.
Saunoa le Minisita ia lelei le tapenaga o le taimi ua tuanai, taimi nei ma le taimi lumanai. Na ia faia foi le faataitaiga i lana fanau, e 5 tausaga ma le 7 tausaga mo le lumanai, pe a oo atu i ai ua 20 tausaga o le isi ma le 22 o le isi, pe a lelei le tapenaina i le taimi nei, auā a maliu atu ia, ae o loo tulai mai lana fanau i se lelei o le aiga ma le atunuu.
Na saunoa foi le Minisita o le soifua maloloina ma taaloga ia Jonathan Coleman i le tāua o le ola maloloina lelei o le tagata taalo, auā e tatau ona tapena lelei le soifua o le tagata ona faatinoina ai lea o le taaloga.
Na fesiligia foi le afioga i le Minisita i ni tickets e malaga ai i Samoa i taaloga a le All Blacks ma le Manu Samoa, ae soisoi Jonathan ma lulu lona ulu e leai, ma fai mai a aumai fua ni tickets o lona uiga ua leai se tupe e maua mo le Manu Samoa.
O nisi o Minisita sa faamalosi i lea mafutaga o le afioga ia Hekia Parata, Minisita o aoga, ma Nikki Kaye o le Minisita o auatalavou, o i laua ia sa tutu faatasi i lea aso ma le la talitonuga, o aoga e tapue ma faufau lelei atu ai le olaga o le talavou. O le afioga i le Minisita ia Peseta Sam Lotu Iiga na faamalosia le tautalaga i le galulue faatasi o aiga, matagaluega ma tagata taitoatasi.
Na faaiu le fonotaga i le tutu faatasi o le afioga i le alii Palemia ia John Key ma le sui Palemia ia Bill English ma faasoa i ni vaega tāua se tolu, o le faamalosiau o le isi i le isi (positive attitude,) agaga finau (hard work), ma le vaai mamao (forward thinking), ma ua avea ai nei taitai o se faataitaiga lelei mo tagata lautele i le galulue faatasi ma maua ai le fealofani.
Ma o le fono foi lea sa maua ai le avanoa e feiloai ai le pati a le National ma le peresetene o lenei pati ia Peter Goodfellow, ma na faafetaia ai foi e le peresetene le Pati ma le lautele o tagata o loo galulue i totonu o le pati i le latou galuega faatino o loo taitaiina ai le atunuu.
O nisi o tamalii o le atunuu sa auai i lea fonotaga, na maua lo latou avanoa i le aoauli o le Aso Toonai e feiloai atu ai i tagata Maoli e toe lalaga le faiā a Samoa ma Maoli e pei ona iai.
O se feiloaiga foi i le fiafia sa iai lea aso ina ua lafo e le faautautaga ia Leulumoega le tofa ia Teleiai Pa‘u Edwin Puni le lauga i le faatamā o le auvaa o le Gaualofa le tofa ia Lauaki Lavatai Maelagi e faia ai se upu faafeiloai mo lenei mafutaga, auā o ia foi o le taitai o tagata folau.
O lea foi avanoa na toe fafagu ai ia Maoli nisi o atinae auā o tatou tagata Samoa.
08
