Ua taunuu i Ausetalia le aumalaga e lata i le tolusefulu o aulakapi pa‘i a alii maa tamaitai mai Samoa o le a tausinio ma ‘au mai isi ‘au e tolusefulu o le a tauina le taua mo le fia maua o le siamupini o le Ipu o le lalolagi i lenei foi ituaiga lakapi.
O le fuaitino o ‘au e lua a le atunuu, na viia e le alii Palemia ona o lana saunoaga o se faailoga o le malosi ma ua tau foi le koleni auā le sauni ai i le sailia o le manumalo. Peitai o lana saunoaga apoapoai na ave ai lana tuualalo i taitai o ‘au ina ia aua le ‘aivalea ni meaai a o iai i le taamilosaga, ona o le tasi lea faaletonu na mafua ai ona lē lelei se tasi o taumafaiga a le aulakapi taitoafitu a Samoa.
“O la‘u lava fautuaga se aua le ‘aivale, ae vaai lelei poo saogalemu taumafa mo le tausiga o le tino auā e tāua tele le itu lena, e faamoemoe i ai le malosi ma le lelei o le faatinoga o le taaloga”, na saunoa ai Tuilaepa i luma o aulakapi pa‘i e lua.
O le tapenaga a Samoa mo lea taamilosaga faavaomalo i le lakapi pa‘i na faaalia e le tofa Pauli Ivan, o le taitaimalaga, ua lelei ona faufau auā e leai lava se isi sini o le faamoemoe, o le o mai ma le Ipu o le lalolagi.
O le naunautaiga foi lea o le afioga i le Palemia ia saili se ‘ai lelei o le tapuaiga a le atunuu. O le taimi muamua lenei ua auai Samoa i le Ipu o le lalolagi ma o se mitamitaga lea o le taitai malaga, auā ua maua se avanoa faaauro o alo ma fanau a le atunuu o loo fiafia e atinae lenei taaloga, e faailoa atu ai i le lalolagi o Samoa ua oo lona tulaga i se maualuga e mafai ai ona ofi atu e tauva ma ‘au a isi atunuu e malolosi foi i le taaloga.
E limasefulu afe le foai a le Malo e fesoasoani i tapenaga a ‘au e lua, ma o le isi lea faafetai lapoa mai le tofa Pauli Ivan i le Palemia, ona ua mafai ai ona gafatia nisi o tapenaga. Na faailoa e Tuilaepa i le faamavaega ma ‘au, e iai isi talosaga mai nisi o taaloga na avatu faatasi ma le talosaga a le lakapi pa‘i ae sa muamua lava pasia e le Kapeneta le latou talosaga.
E lei faailoaina e le Palemia poo ai itutino tau taaloga na avatu a latou talosaga mo ni fesoasoani tau seleni, ae e lei faia i ai se faaiuga poo ua teena foi. Ia manuia tele le alofaiva o ‘au e lua, talosia ia maua ai se tala faafiafia loto i le tapuaiga a Samoa, ona ua mavae atu nisi taamilosaga lakapi taitoafitu ua lē tau lelei ai le faafofoga ma le silasila a le atunuu. O outou māmā na!
