E iloa le Samoa i lana tu, o lana savali atoa ma lana tautala, soo se atunuu lava e soifua ma ola a‘e ai le Samoa i iloagofie lava i ana measina. E lele le toloa ae maau lava i le vai.
E tau lē faailoa le aganuu a le Samoa i totonu o soo se atunuu o le mafuaaga foi lea o le taumafai ai lava o tupu ma tamalii o Samoa e aoao lana aganuu i ana tamafanau o loo soifua ma fananau i atunuu i fafo.
O le manulauti lea o loo naunau ma saaafi i ai le susuga ia Tanoai Reupena Michael Tanoai faapea le tofa ia Tuuu Apulu Mary Autagavaia e faasoa le tomai ua maua i ona uso ma tuafāfine sa fananau i totonu o Aotearoa ma Ausetalia.
O le susuga ia Tanoai Reupena na ia amataina lenei polokalame ona o lona vaai alofa i ona tagata, o ni vaega sa sasaa atu e lona tuaa ia te ia, sa ia faamaumauina uma i lalo ma ua tele ai lona silafia ma ua ia manatu ai ua tatau foi ona faasoa lea meaalofa mo tagata Samoa e lei silafia ia vaega o le aganuu.
O le tausaga ua mavae na amata ai loa lenei aoga o le aoaoina lea o le aganuu a Samoa. O le folafolaina o sua, sulatoga mo tamaitai, folafolaina o toonai, feiloaiga ma le tufa ava faatasi ai ma le iloa o faalupega a lona nuu.
E 20 agai atu i le 30 tagata sa amata ai. O le Fatalaleleina Fou o le vaega muamua lea o loo faagasolo, o se luitau ma soo se auala e tapue mai ai tupulaga, auā o le tele o tupulaga ua lē toe o i ni lotu, e pei o Ekalesia EFKS, Metotisi ma le Katoliko faapea isi lotu, ma o le mafuaaga tonu lea o lenei faamoemoe.
O le taimi muamua sa faatinoina lava na o totonu o le lotu Katoliko ae o le taimi nei o lea ua mafai ona faasafua atu mo le Metotisi ma le EFKS ma isi lotu. E tolu ni vaega o loo agai i ai lenei aoaoga: Community, o totonu o Ekalesia e ala i autalavou faapea ma Aiga.
E 10 vaiaso e aoga ai le tagata, ma o loo aoaoina i le gagana faaperetania ma le faasamoa ina ia faigofie ona pue e tamaiti le sini autu o le polokalame. Saunoa Tanoai ua tele le suiga ua iai le aoga ona o le toatele o i latou o loia, o fomai ma leoleo ua taufai taufetuli atu i le fia maua o lea measina o le atunuu. Ua silia nei ma le 140 i latou ua faatāuaina lenei avanoa e aooga ai, e aofia ai ma Melepone ma Brisbane i Ausetalia o loo iai isi aoga e lua.
O le po la o le Aso Faraile na tumutumu ai le atunuu i le aoga a le Martin Hautus i Onehunga i le mamalu o mātua ma aiga e molimau le tāua ma le iloa o le aganuu ua maua e alo ma tamafanau o Samoa sa fananau i Niu Sila nei.
Sa faapea foi ona auai ai ma le afioga i le Minisita ia Peseta Sam Lotu Iiga ma le afioga i le faipule ia Su‘a William Sio.
Taitai o le sauniga na ia tatala aloaia le faamoemoe o le afioga ia Petele Iosefo Timu. Na faatinoina foi le ‘ava o le feiloaia e pei ona masani ai le aga faatupu ma aga faatamalii a Samoa.
O le susuga ia Kosetello Elu sa tufaina le ‘ava ae o Nellie Papalii sa fai ma taupou e paluina le ava. Na mataina ma maua le ‘ata e le auvalaaulia i le pepese o tamaiti aoga i faalupega o latou nuu, o le folafolaina o sua ma toonai, ae faapea foi i le sula toga a tamaitai.
E ui i se lē lelei o le tautala i le gagana Samoa, ae sa manino lelei le autu ma le faamoemoe e pei ona iai le polokalame o le po.
Sa tele foi ina fesiligia e le fofoga o le po le susuga ia Charlie Tevaga tamaiti aoga pe aisea ua tāua ai ia i latou lenei polokalame, o nisi na saunoa o latou o matai e naunau ai lava e fia iloa vaega faamatai i Samoa, ae o nisi e faapea e tele mea faaleaiga e fai e fia o ai lava e tautua aiga e ala i le aganuu.
Na maua foi le avanoa e saunoa ai le Minisita ia Peseta Sam Lotu Iiga ma le Tofa Su‘a William Sio i le tāua o le aganuu a Samoa. O le autalavou a le Taimua Youth Ministries sa faafiafiaina le mamalu o le atunuu a o fai le taumafataga.
O se po fiafia i aiga ma mātua e ona latou fanau sa faatinoina le polokalame, i le telē o le aogā o lenei manulauti i totonu o aiga, nuu ma Ekalesia.
