O se atugaluga tele lenei ua faaalia e le Minisita Agai o Tupe le sui faipule o le Tautua Samoa, Afualo Dr. Wood Salele, i le tulaga ua iai nei le aitalafu a Samoa i atunuu ma faalapotopotoga i fafo. O le mau a le sui o le Tautua Samoa, e matuā telē le galuega a tagatānuu o Samoa i le tau toe totogi atu o lenei tupe tele.
“O le piliona tala e lē o se tupe laitiiti, e matuā telē tele,” o lana saunoaga lea i le faaiuga o le vaiaso. Faaalia e Afualo a vaevae le tupe lenei i le faitau aofai o le atunuu e tusa ma le $5,000 tala a le tagata e tatau ona totogi atu mo aitalafu nei, peitai o le toatele o tagata Samoa e lē ausia lea ituaiga seleni maua ma e faigata tele i le lumanai ona tau togitogi lea tupe. Faaalia e Afualo Dr Wood, o le taimi lenei o loo vaaia le malosi pea o le galuega ua faatino e le malo auā le fausia o fale tetele, o galuega tetele e pei o auala ma isi galuega e pei foi ona iai falemai tetele ia ua mae‘a ona fausia.
Sa ia ta‘ua foi o le tamaoaiga o Samoa e pei ona mae‘a folasia ua vaavaai ai i le tusa ma le $1.6 i le $1.7 piliona ae o lea ua agai i le $1 piliona tala le aitalafu ma ua faaalia e lea taitai e tatau lava i le malo ona silasila toto‘a i le mafai ai e le atunuu ona toe totogi nei nonogatupe. E lē o se taimi muamua lenei ua laga ai e le Itu Agai aitalafu ua faia e Samoa i atunuu mamao ona o le unai o atinae o le atunuu, ma na faaalia e le afioga Afualo, e lelei le tulei o atinae ae o le vaavaai foi i le taumafai e tali atu i atunuu ma faalapotopotoga faavaomalo ia ua fai maliega e nonō mai ai seleni mo atinae a Samoa.
O le mau a le alii Palemia le Susuga Tuilaepa Lupesoliai Sailele Malielegaoi i taimi ua mavae na laga ai foi lenei mataupu, o le mafuaaga lea o le matala mai o avanoa e aitalafu ai Samoa mo ana atinae ona ua iai le faatuatuaga o Malo i fafo aemaise foi faalapotopotoga o tupe i fafo e mafai e Samoa ona totogi nonogatupe ua ia faaaogā mo ana galuega faagasolo.
O le vaiaso lenei e toe taliu mai ai i Samoa le Alii Palemia i se faigamalaga o loo auai atu ai ma se tasi o Minisita Lagolago o le Matagaluega o Tupe, e lē gata i lea o le Ofisa Sili o le Matagaluega o Tupe ia Tupa‘imatuna Iulai Lavea i le fono faaletausaga a le Faletupe o Atinae a Asia, se tasi o faalapotopotoga tele o tupe ua tele foi se fesoasoani e ala i le nonō mai o seleni mo atinae a le atunuu.
O lea fonotaga e toe talanoaina ai aitalafu nei faatasi ai ma le Faletupe o le Lalolagi o loo auai atu i ai aemaise o galuega ma le latou foi vaai i le tali atu a atunuu ua faapea ona agai i nei faletupe mo fesoasoani ma nonogatupe.
O le atugaluga o le Tautua e pei ona unai pea ina ia aua ne‘i alualu ai pea ma saosaoa le agai o Samoa i fafo mo tupe e nonō ona o le popolega nei i ai lava se taimi e lē mafai ai e Samoa ona totogi nei nonogatupe.
