Le uluai Samoa i tauvaga lauga faavaomalo i totonu o Niu Sila

Ua toe faagasolo nei foi tauvaga lauga faavaomalo a Niu Sila mo le tausaga nei 2015 i le faalapotopotoga lenei o le Toastmasters i le lalolagi.

E pei ona masani ai, o nei tauvaga lauga e faia i tausaga uma i totonu o Niu Sila, e saili ai se sui e toatasi mai Niu Sila e tauva i tauvaga lauga a le lalolagi atoa, o le a faia lea i Las Vegas i le masina o Aukuso i le tausaga nei lava. O lea la ua toe faamaonia mai, e faatolu ona manumalo Ami Pepe i le amataga mai o tauvaga lauga o le tausaga nei. Lea ua toe manumalo foi o ia i le tauvaga faaiu a Aukilani Division A, ma ua toe sauni atu nei mo le sueina o le siamupini i totonu o Niu Sila i le tausaga nei.

O le aso 8-10 o Me 2015, o le a faia ai le tauvaga faaiu a Niu Sila i le Waipuna Lodge i Aukilani. Ua iai le fuafuaga e toaiva sui tauva mai Niu Sila atoa o le a tauva ai i lenei tauvaga tele, ma le faamaoniga e toatasi lava le alo Samoa o Ami Pepe, o loo taumafai atu pea o ia ina ia manumalo mai i nei tauvaga faaiu.

E pei ona ta‘ua e le tele o faamaumauga tusitusia i le taimi ua tuanai atu, o le faatolu ai lenei ona taumafai o Ami Pepe i le sueina o se siamupini i totonu o Niu Sila, talu ona ofi mai o ia i totonu o le faalapotopotoga lenei o le Toastmasters i le tausaga e 2012.

O le tausaga e 2013, na tulai mai ai o ia i le tulaga tolu, 2014 na tulai mai ai i le tulaga lua, ae o lea ua iai le talitonuga a le toatele, ua iai se faamoemoega ina ia manumalo Ami Pepe i le tausaga nei 2015.

O Marlene Krone, o se tamaitai lea ua avea nei ma faiaoga i le aoaoina lea o Ami Pepe i le tausaga nei. Fai mai se faamatalaga a lenei tamaitai faiaoga, ua iai lona talitonuga, ua oo atu le maualuga ma le tomai o Ami Pepe, e avea ai o ia ma se siamupini a Niu Sila, ae lē gata i lea, o se siamupini i totonu o le lalolagi atoa.

O le sini faamoemoe o Ami Pepe, ina ia faailoa atu i le lalolagi, o tagata Samoa, o le latou lava matafaioi masani, o le failauga.

Ua faatuina foi e Ami Pepe ma Marlene Krone le Toastmasters i totonu o Magele i Aukilani (Pacific Toastmasters), e faapitoa lea i le aoaoina o tagata Pasefika, i le avea ai ma ni tagata failauga tomai.Susuga Ami Pepe a o tauaaoina ona faailoga i le manumalo ai i le tauvaga faaiu a Aukilani Division A