Faigata ona talia e le Faamasinoga lana faamatalaga

O le faamatalaga tele a le alii o Uili Tialino i le Faamasinoga maualuga ina ua iloilo le moliaga o le gaoi a o avea ma tagata faigaluega – o le tupe a lona ofisa lea na ia faaaogā – na alu i se atinae na manatu e tatau ona toe faaopoopo ai le tupe maua a lona kamupani i le lumanai. Na ia ta‘ua lana gaioiga na fai o se faaputugatupe mo le lumanai (investment).
O le faaiuga a le Faamasinoga i lea mataupu – o le gaoi a o avea ma tagata faigaluega le sa‘o o le moliaga, o le sa‘o foi lena o le mea na tupu auā o le tupe faasao lea na ta‘ua e lenei alii i luma o le Faamasinoga, o le tupe a le kamupani na galue ai lenei alii ae lē o sana lava tupe. Atonu sa iai se mafaufauga o lenei alii e toe totogi lenei tupe peitai e oo mai i le taimi o le faamasinoga e leai lava ma sea gaioiga na fai. O le tausaga e 2011 i le va o masina o Aukuso ma Tesema na ave faagaoi ai e Tialino se  tinoitupe e tusa ma le $114,000 mai i le kamupani na galue ai o le Gold Star.
Sa galue Tialino i le vaega o tupe ma e tulai mai lea solitulafono o loo avea o ia ma Pule o Tupe a le kamupani lenei i Apia.
Faaalia e lenei alii o le pisinisi a lona tuafafine e i Ausetalia lea na ia lafo i ai le tupe lenei ma le mafaufau lea e faaopoopo le seleni ma maua ai se tupe faasili a le kamupani.
O le umi tele ona tulai mai o lenei mataupu ae e lei toe maua lava se tupe a le Kamupani ua talitonu gatā ai le faamatalaga lea a lenei alii i luma o le faamasinoga.
Ona pau le tulaga mautinoa e pei ona saunoa le tamaitai Faamasino na seei i lenei mataupu, le Susuga Ida Malosi, o le fai e lenei alii o lea solitulafono ua aveese atoa ai le faatuatuaga na tuu atu ia te ia, o se tasi e maualuga le tofi ua ave i ai, e vaai ai tupe a lea kamupani.
O folasaga i luma o le faamasinoga na manino ai o le alii lenei na ia ave lava na o tupe na maua atu i faatauga o lea aso ma lea aso. E na te lei lotea lava ni siaki a le kamupani ae o totonu o le fā masina lea na ia faatino ai lenei gaioiga sese.
O le faamatalaga a le tamaitai faamasino ina ua tolaulau le iuga o lenei alii, e leai ma se talitonuina o le faamatalaga lea ua aumai faapea na ave i le pisinisi a lona tuafafine lenei tupe ma faamautu ai lava le moliaga o le gaoi a o avea ai ma tagata faigaluega Tialino.
O le iuga a le Faamasinoga o le tuli o le sala faafalepuipui e lima tausaga.