Tele se galuega saili ni fanau fia galulue auala o fesootaiga

E tele se galuega e faia mo le faatosina o fanau o le a iu aoaoga i le vasega 12 ma le 13, e ulufale ai i le vasega mo aoaoga i tomai tau i galuega i auala o fesootaiga i leitio, televise ma nusipepa faapea upega tafailagi poo le website.
O le molimau lea ina ua maea le vaiaso atoa na tea nei na faasavali ai se talaiga faalauiloa a le pulega o le iunivesite aoao a Samoa e faasino i le aoaoina o tomai faatusitala ma galuega faasalalau, ma tusitala sinia i le atunuu sa mafai ona maua le avanoa e malaga ai i Kolisi ma aoga maualuluga i le atunuu i Upolu ma Savaii.
O le afea o nisi o Kolisi ma aoga maualuluga i le atu Aleipata, na molimauina ai e itiiti se silafia o fanau aoga i lenei tomai faapitoa. O le toatele lava e faapea latou o se galuega e na ona faailoa ai se tagata ia iloa tele ai, pe a tautala i le leitio, le televise ma tusitusi foi i se nusipepa.
O se tasi o vaega taua sa faailoa e se tasi o tusitala sinia i le faalauiloaina o lea tomai, o le fautua i fanau ia aua nei toso eseina o latou lagona mai le ulufale e aoao lea tomai i le Iunivesite aoao a Samoa, ona o lafoga a le alii Palemia i le tele o taimi e faatalanoa ai e alii ma tamaitai tusitala, lea e faapea ai ana saunoaga o i latou o loo galulue ai o le aufaitatala, ma le au suetala ma le au faatupu tala.
O le molimau foi lea sa matauina ile talanoa mai a nisi fanau, e faapea lava latou ose galuega e leai se lumanai taua. O le pitolaau a le au tusitala ma le au faasalalau o le esetete lona fa lea o soo se pulega faatemokarasi poo le fourth estate. Peitai e le masani ona faafofoga i ai le lautele o tagata, ona e taotaomia i lalo ona o tua patatua o le galuega pe a oo ina loloto ni sailiiliga i le fia maua o le mea moni ma aliali ai ni faaletonu e aafia ai ni taitai o le Malo, ekalesia ma pulega i totonu o faalapotopotoga tumaoti ma totonu o pulega a nuu ma afioaga.
O le maea ona faatino le talaiga i le faaiuga o le vaiaso na tea nei lea na faamuliga i Savaii, ua talitonu ai le vasega o aoaoga faatusitala a le Iunivesite aoao a Samoa, ua taoto atu i fanau se faapupulaga o le manaomia o se alii ma tamaitai e aoaoina lea tomai ma avea ma a latou tautua e galulue ai pe a faauu ma maua tusipasi ma faailoga tipiloma.