Faailoa taleni a le Samoa Youth Alive Harvest Worship Centre

E fiafia lava tupulaga talavou e vivii ma faailoa a latou taleni  ua faaaogaina ai i latou ia latou auaunaga i le Atua.
O le Aso Faraile, aso 6 o Setema i le 6.30pm i le afiafi na faalauiloaina ai ma faatau atu  le DVD o le Samoa Youth Alive 2013 o tupulaga talavou a le Ekalesia Harvest Worship Centre.
Sa matuai faatumulia  ai le pitonuu o MARSDEN i Logan City. E $25 tala sa faatau ai i lea po ae $30 tala i le seti ina ua maea lea aso taupoina.
O ni vaega tupe ia o loo sailia e tua i ai le autalavou aua a latou faagaioiga ma le tau atinaeaina o autalavou a le Ekalesia.
Sa auai mai ai le Susuga ia Ps Siagigi ma le faletua ia Philomena Vaafusuaga mai Faleaseela Lefaga i Samoa, o le Faatonu o lenei polokalame matagofie mo tupulaga o Samoa.
O le susuga ia Ps Moala Siliva Moala o ia o le failautusi aoao o le Ekalesia Worship Centre i le lalolagi sa mafai foi ona auai mai, lea ua avea ma faifeau o le aulotu fou i Pine Rivers na tatalaina i le masina o Me o le tausaga nei.
E le gata i lea sa auai uma faafeagaiga ma ekalesia uma a le Harvest Worship Centre i Kuiniselani aemaise i latou sa molimauina le maimoaina o lea DVD.
Sa uli ma sao ma manuia polokalame uma o lea afiafi e pei ona taua e le failautusi le susuga ia Ps Anthony Mauinatu ma molimauina e le toatele. Ua faailoa mai foi ua tu mai le foe le susuga ia Ps Rikisone (Fasitoo) ma le faletua ia Laumua Uelese (Toamua) e avea ma taitaifono a le ekalesia aoao a le Worship Centre i Kuiniselani.
O le aufaipese lava a le Ekalesia Harvest Worship Centre i Woodridge sa peseina viiga o le tatalaina o le DVD a le Samoa Youth Alive 2013.