Faamanuiaina Metotisi Vailoa Faleata i le CSSP

Ua faamanuiaina le mafutaga a tina poo le auuso fealofani a le Ekalesia Metotisi i Vailoa, i se fesoasoani e tusa lona tau ma le $30,000 tala mai le Polokalame o le CSSP.
Sa vaaia le taliaina ma le agaga faafetai lenei fesoasoani e le tina o le mafutaga faapea le tina o le galuega, Tuleiesea Komiti Alainuuese, ona o se faamāmā avega foi auā le atinaega o aiga, nuu ma ekalesia.
O nei fesoasoani e aofia ai laau suisui, o se pusa‘aisa taatia, o se ogaumu e alu i le uila, o ta‘aigaie ma isi, lea e $30,000 tala lona faatupeina.
Sa saunoa le sui o le CSSP, Matthew Tofilau, i le mafuaaga na faamatuu mai ai lea fesoasoani mo le mafutaga a le Ekalesia Metotisi i Vailoa e pei ona ia ta‘ua o le faagasologa lava lea o fesoasoani a lenei faalapotopotoga ina ia mafai ona tuu atu le tau‘au ia i latou e lē tagolima ma o loo saili auala e mafai ona faatutū ai ni atinae.
E ave le talosaga i le CSSP ma e faia asiasiga ina ia mautinoa e umi ma faaauau lenei foai ma le faaaogāina.
Na amata le faamoemoe a le mafutaga a tina i le faiga o ie soosoo ma taga solovae, o le lalagaina o meataulima faapea le tuiga o teu mo falesa ma isi, mo asiasiga masani a tina o le mafutaga i Masina taitasi, ma o lea na matauina ai le tele o se manaoga o loo iai, auā le faatinoina o lea atinae.
O le masina o Tesema o le tausaga nei lea o le a faia ai le faalauiloa muamua a le auuso, e faailoa ai fua o a latou galuega faatino, ma o le a faaauau mo le sefulu ma le lua masina.