Fai togalaau, se masaniga lelei

E manatu le tina ia Rosemary Weir, o lenei matata o le fai togalaau, e le gata e maua ai lagona fiafia ma le faamalieina pe a tagatagai atu i le matagofie mai o le fuga o fugalaau, ae o se masaniga foi e maua ai le soifua maloloina lelei, a o maua ai sina faamalositino.
O Rosemary Weir, o ia o le peresitene o le sosaiete a le au faitogalaau ma tusiga ata i Papatoetoe, le Papatoetoe Garden and Floral Art Society. Ma o le vaiaso talu ain a faia ai i Papatoetoe se faaaliga o le lasi o fugalaau eseese aemaise o auala o loo tausi ma faamatagofie ai e sui eseese o lenei sosaiete a latou laau.
O lea faaaliga na faaaliali ai foi le tele o tamai laau ua uma ona toto i apa toto laau, ma sa faasilasila ai foi ma nisi ua manumalo i lenei tausaga i vaega eseese o le faiga o togalaau i Papatoetoe, ma o nei foi togalaau e le o taotasi i na o laau mo fugalaau, ae faapea foi soo se laau toto e aina ma faaaoga mo taumafa.
O se fiafiaga i le tina ia Rosemary ona ua toe faaolaola mai i lenei tausaga lea foi faaaliga taua i totonu o le aai o Papatoetoe, aua sa lei faataunuuina lea faaaliga i le tausaga talu ai, ona o le faaletonu o le faamaopoopoina o le polokalame.
Fai mai Rosemary, o avanoa faapenei e faaalia ai lou mitamita i lou pitonuu, e te mitamita i lou aai, ma lou atunuu. Foliga mai o lenei tina, na soifua ae lava o fiafia i lenei matata, aua sa faia foi e ona matua. Fai mai Rosemary, afai ae gau ese se lala mai se laau, e le mafai ona e tiai ese, ae tatau lava ona toe sunui ifo i le palapala ina ia toe ola ai se isi laau.