E manuia le soifua finafinau?

E selesele e le galue finafinau ma le faamaoni le tele o faamanuiaga aemaise le faaeaea i faailoga taualoa. O le tulaga lena na tini i ai taumafaiga ma alofiaao o se tasi foi o alo o Samoa, le susuga ia Visesio Louis Thomsen, ina ua ia maua faailoga e sili ona maualuga i le tufatufaga faailoga i lenei tausaga a le Villa Maria Cult-Couture Awards, lea na manumalo ai lana laei, o le ofu faaipoipo mo se tausaga Samoa, sa faaigoaina, Le Tatau Bride.
O le susuga ia Visesio e mai le pitonuu o Manurewa, ma e oa aao o lenei foi auauna e le gata i le mamanuina o sikaili eseese o laei, ae o le auala e faataatitia ai nisi o teuteuga i luga o na sikaili. Ua fai foi sina umi o faatautaia e le susuga Visesio lenei taleni, e le gata i Niu Sila nei, a o Samoa i so o se taimi e asiasi atu a ii le atunuu.
O le vaiaso atu la i ona tua, na manumalo ai Visesio i lea faailoga, i le faaaliga o mamanu eseese ma soo se faiva alofilima, e pei ona faatautaia i le nofoaga tutotonu o meafai a le Pasefika, le Pacific Events Centre i Manukau.
E le o se taimi muamua foi lenei ua ulufale ai Visesio i lenei sailiga faailoga, ae o lenei ua iu ina tau lau o le faamoemoe, ua tali mai tatalo ma naunautaiga sa tau ao tau po ina ia ia se aoga o nei tautiga, a o lea ua iu ina manumalo i lana laei, Le Tatau Bride. Na manumalo foi Visesio i le faailoga o le Manukau Designer Award ma le Matrimonial Bliss.
I se saunoaga a le pule o lenei faamoemoe, Chantelle Whaiapu na ia taua ai, ua matua tatau nei faailoga mo Thomsen ma o se tasi o fiafiaga ona o se tasi mai le aai o Manukau ua ia maua lenei faailoga.
E lei faigofie le tauiviga a Thomsen mo lenei faailoga aua e toatele foi nisi ua iloga i lenei taleni sa latou tauva faatasi, e pei o i latou sa fai ma sui o le Motu i Saute, o Ueligitone, ma le Bay of Islands.
Na matua mataina i le silasila a faamasino, Judges Rachael Churchward mai le mekasini o le Mindfood ma i laua ua iloga i le mamanuina o sikaili o laei, Adrian Hailwood ma Jaeha-Alex Kim, le laei o Le Tatau Bride na saunia e Thomsen. Na latou faamatalaina o se laei e “malosi, e aulelei, ma ua matua matagofie ona faaata mai ai le mamanu ma vaega uma o le aganuu ma mafaufauga faa-Samoa ma lona faaaogaina.”
O nisi nei o faailoga na tufatufaina ai i lena aso:
Villa Maria Cult – Couture 2008 winners:
Premier award: Visesio Louis Thomsen for Le Tatau Bride.
Manukau designer: Visesio Louis Thomsen for Futuristic Island Princess.
Flight of Fantasy: Lisa Li of Bucklands Beach for Blue and White Porcelain.
Formally Yours: Karen Chan of Auckland for Harmony.
Obviously Organic: Donna Campbell of Hamilton for Hot Az.
Recycled Revolution: Jackie Stoddard of Bay of Islands for A Stitch in Time.
On the Streets: Margaret Lewis of Westmere for Quilted Dream.
Matrimonial Bliss: Visesio Louis Thomsen for Le Tatau Bride.