Poto e sue lana selulâ

Ua avea le atamai o le togafiti na fai e le alii o Kaku, foliga o lea ua moomia e leoleo, e tatau ona apalai mo sana galuega faaleoleo, aua o ituaiga o tomai nei e moomia tele i lea foi galuega, aemaise i le tau sailia o le au faaletonuga o loo solia nei le tele o tulafono.
O le masina o Aukuso na tulai mai ai lenei faalavelave, ina ua gaoia e se tagata le komepiuta laptop a Kaku, gaoia foi ma lana tamai laau mp3 player, ma lana selulā. Na lagona e Kaku le faanoanoa, ona e ui sa agai atu ma lipoti i leoleo le mea ua tupu, ae na ia mautinoa, ua faamavae lava o ia ma nai ana mea totino taugata nei.
Ina ua mautinoa e Kaku o loo iai i se isi tagata ana mea ua gaoia, na mafaufau loa i se gaioiga filemu e taumafai ai e toe faafoi mai. O lana togafiti na fai, na ia saunia se ato o faailoga, o se pepa talaoloa, ona faataga momoli loa lea o sana feau (text messaging) i le tagata, ma faailoa i ai, ‘Faamanuiaga – ua e manumalo i se meaalofa o le pepa talaoloa e tusa le tau ma le $500 tala mai se supamaketi.’
E lei fia ni minute na alu ai le feau ae foi ane loa le tali ‘O ai oe?’
Na toe momoli e Kaku le isi feau ‘Tau mai lou suafa ma lou tuatusi’. Na talia fiafia e le alii gaoi le feau na alu atu, ma malie foi e oo atu Kaku i lona aiga mo se la feiloaiga.
Na sauni uma e Kaku le meaalofa e pei o na faailoa i le faamanuiaga, faatasi ai ma se pepa o loo iai ni fesili e moomia ona faatumu e lenei alii, ma fafao i se teutusi ua lomia faapitoa ai le igoa o le supamaketi lea o loo faaaoga i lana togafiti.
E tele lava mea na lape ai le fia tama poto o le alii gaoi lenei, aua na taunuu Kaku i lona fale ma faatonuina lenei alii e tatau ona tuu ane sona ID poo se pepa faamaonia ina ia mafai ai ona ia ave i tua lona faailoga. O ina loan a sei ane ai e le ula lenei le telefoni selulā a si alii o Kaku.
Na talosagaina foi e Kaku lenei alii pe mafai ona pue faatasi so la ata faatasi ai ma feau ia na auina atu e faailoa ai lona faailoga, ma sa malie ma le fiafia i ai si alii amiovalea.
Taua e Kaku, o le isi itu malie lea i lana togafiti na fai, ona ua avea le ioe fiafia o le alii gaoi i ana tonu uma na fai iai, ua pei ai o se mea malie ia te ia le tulaga ua tulai mai, o se tulaga e seasea tupu, o le pue faatasi o le ata o se tagata solitulafono ma se isi o loo mafatia ai i lana soligatulafono.
Na tasi le itu na toe sasi ai le mataupu a Kaku, aua ina ua uma lelei ona maua ana faamaoniga, ona faatopetope atu loa lea i le ofisa o leoleo e logo i ai le tagata gaoi, peitai na mulimuli mai tua lenei alii ma ia iloa mai le itu ua agai i ai Kaku, ma taumafai loa e tuliloa le taavale a Kaku, peitai na mafai o na toe sao ese mai ai Kaku.
O le alii e pei ona ua molia nei i lenei soligatulafono, e 29 ona tausaga mai le pitonuu o Hemilitone, ma o se tagata ua pauai i lana amio o le gaoi. Ua i luma nei la o le faamasinoga mo ni moliaga e 46, ma na taua e leoleo, e tele nisi aiga ua tofo foi i le leaga o le amio a lenei tagata, mai lava i Aukilani seia paia Timaru.
Peitai, e momoli le faamalo a leoleo i le atamai o le faatinoga e Kaku o lana sailiga. Ua toe faafoi uma ane nei ia Kaku ana meatotino na goia, faatasi ai ma se fautuaga a le alii leoleo o Anthony Baker, ‘e fetaui lelei Kaku mo tiute faaleoleo.’