Faatu taaloga Lotto a le Malo

Ua taunuu se isi miti a le Malo e saili ni seleni e saga atinae ai taaloga a alo ma fanau o le atunuu aua o le isi lea malae ua avea ma tausinioga a Malo tetele o le lalolagi aemaise o le maua ai o galuega ma selesele i ni seleni lelei pe a maoae le taumafai i soo se taaloga.
O le Aso Toonai, 10 o Oketopa 2009, o le a faia ai le uluai se‘i poo le draw o le taaloga o le Lotto a le Malo ua faaigoaina o le Samoa National Lotto ma o le komiti o petipetiga ma taaloga faitupe a le Malo le TAB o le a faatautaia lea taaloga Lotto fou, o le a tauva ai ma le isi kamupani o loo faia foi lea taaloga le Lotto Samoa i Vaigaga o loo pulea ma umia e se vaega o le auaiga o William Keil.
Ua maea nei ona faapipii masini ma vaega uma e faatino ai lea taaloga fou ma ua faaalia e le taitaifono o le Komiti o le TAB le afioga Oloipola Terrence Betham, o le a le i lalo ifo o le selau afe le faailogatupe muamua o le latou taaloga mo lana se‘i muamua i le Aso Toonai o le a sosoo ma le Aso Sa o le Lotu a Tamaiti o lenei tausaga 2009.
O le taimi nei o loo maua tupe e le TAB mai ponesi o loo totogi i ai e isi taaloga faitupe e pei o le Lotto Samoa, ma le Sportslotto, ae peitai ua siitia pea le manaoga o taaloga i ni seleni ma o le mafuaaga lava lea o le faia o se faaiuga a le Malo e faatu loa se isi taaloga Lotto e sue ai atili ni tupe mo lea faamoemoe.
Sa faailoa foi e le alii Palemia i se taimi e lei mamao atu i se feiloaiga ma tusitala le silasila o le Malo i se auala e maua ai nisi seleni faaopoopo e faamalie ai le manaoga o taaloga.
Na mafua lea finagalo o le taitai o le Malo ina ua taunuu atu se manaoga o le asosi lakapi liki mo se vaegatupe e $60,000 mo nisi o a latou polokalame e siitia ai foi lea lakapi.
O le Iuni lakapi a le atunuu o loo maua lana $300,000 mai le faasoa a le Malo i le tala autu o le Tupe ma e le o se tausaga muamua lenei ua faamatuu atu ai ia vaega tupe mo le lakapo iuni.
Ua faaalia e Oloipola Terrence, pe afai nei e manuia le faamoemoe o le Malo i le taaloga Lotto o le a amatalia i le masina fou, o le a le gata ina fesoasoani atu ai i manaoga tau tupe o taaloga eseese ae o le a faasafua atu foi seleni o le a maua mo isi faalapotopotoga tumaoti ma aoga i le atunuu.
O le Lotto Samoa na muamua faatuina ma o se kamupani tumaoti, ae o le faagasologa mai o lea foi taaloga faitupe e iai suiga ua faia i ai e pei ona sa amata e na o le 28 fuainumera e faia i ai matematega, ae o le taimi nei ua oo i le 31 numera.
O le hit three poo pigi faatolu le isi vaega e mafai ona matemate ai tagata taaalo, ae e le tutusa le maualuga o faailogatupe e manumalo ai.
O se taaloga ua toatele le atunuu ua manuia ai i ni faailoga tupe tetele ua oo i le tai $300,000 mo le jackpot, ae o loo iai le manatu o nisi atonu o le tulai mai o le Lotto fou o le a sili atu pe oo lava foi i le ‘afa miliona se manumalo o le faailoga muamua le jackpot.