Iloga le sao tamaitai Samoa i le au NZ Maori

E ioe le toatele o le au maimoa, na iloga le sao na faia e le tamaitai afa Samoa, o Joan Sione i le faatoilaloina e lana au, le NZ Maori, o le au malosi a tamaitai Ausetalia, le Jillaroos, e pei ona faia lena taaloga mataina i le malae a le Aucklands Ellerslie League i le afiafi o le Aso Tofi talu ai.
E uma le afa muamua o le taaloga o loo taufaafefe mai le Jillaroos a Ausetalia i o latou ai e 14 i le leai a le NZ Maori, peitai na finau pea tamaitai o le NZ Maori e toe faamaopoopo lelei a latou gaoioiga, ma faafuasei ai ona toe liai mai le malosi o tamaitai Niu Sila i le kuata mulimuli lava o le taaloga, ma faamalieina ai le manao o le au maimoa liki i lena afiafi, ina ua minoi teine Niu Sila ma faatino ai nisi o vaaiga sili ona mataina i lena taaloga.
O se tasi o sui sa mataina lana taalo mo le au a NZ Maori, o le tamaitai Samoa o Joan Sione.
O nisi o taimi pe a tamoe Sione, sa faigata tele i le Jillaroos ona tau puipui mai le osofai atu a Sione, lea na vaaia ai le mafitifiti i tua o nisi tamaitai se toatolu a le Jillaroos, a o liai atu e Sione le polo i le isi ona uso taalo ma agai atu ai loa lena tamaitai e tatao le polo i le laina sikoa.
E lei umi ona va lena ata matautia a Sione, ae toe tatao loa foi e ia lava le isi sikoa mataina, ma tulai mai ai ‘ai o NZ Maori, ua 18, i le 14 a nai tamaitai Ausetalia.
O Sione, o lona tamā e mai le afioaga o Vailoa, peitai e iai foi ma isi ona uso Samoa o loo latou taaalo faatasi i le au, e pei o le tamaitai o Kally Leota ma Tunafa’i Poulava lea sa taaalo i le tausaga talu ai mo le au a le ‘Fetu’ a Samoa, i le Ipu a le Lalolagi o le Lakapi Liki, faapea foi ma le tamaitai mai le Kiwi Fern, o Sarina Fiso.
E ui o se vaiaso pisi na sei faatoa mavae atu nei mo Joan Sione, ae o se vaiaso foi o le faaeaina ma le tauia o ana taumafaiga fita, aua ua aofia ai foi lona suafa i le au lakapi liki a tamaitai Niu Sila ina ua maea ai taaloga na faia lea sa taalo mai ai i le au a Aukilani Samoa.
E ese mai na faamanuiaga, sa filifilia foi Sione e avea ma teine taalo sili ona mataina o le taamilosaga (Player of the Tournment).