Malosi puipuiga o sauaga i aiga i Ueligitone

“Ua i o outou aao le malosiaga e taofia ai faiga sauā” o le auau lea o se faatasiga a nisi o faafeagaiga ma o latou faletua i le aai o Ueligitone sa alo atu i ai mo le aso e tasi.
O lenei faamoemoe sa faamaopoopo e le Matagaluega a le ekalesia PIPC a Ueligitone ma na faataunuu i le aso 19 o le masina lenei.
O faafeagaiga na auai, o le Susuga Tauinaola Tofilau ma le faletua mai le PIPC a Newtown, le Susuga Elder Elama Maea ma le faletua mai le PIPC a St Davids i Petone, o le Susuga Perema Leasi ma le faletua mai le ekalesia Christ the King, PIPC i Porirua, faapea ma sui o komiti faafoe a na aulotu e tolu.
Taua e se faafeagaiga o le matagaluega, ‘O le amataga lenei o se faasologa o ni faatasiga o le a faasolosolo pea ona fai, ina ia faalautele atili le malamalamaga o tagata o le aai i faafitauli o loo latou fesagai, e pei ona faaalia e se tasi o faafeagaiga mai lea polokalame’.
O le aoga o lenei fefaasoaaiga o manatu, ua malamalama uma ai i latou i ituaiga eseese o sauaga o loo tutupu i totonu o aiga, aemaise poo a auga o nei sauaga, ona faigofie foi lea ona talanoa i nisi o auala latou te faaaoga e fesoasoani ai i aiga o loo aafia i nei sauaga ina ia taofia lenei mala.
Na aofia i nisi o failauga autu o lena aso, le tamaitai o Ruta Faiga, o ia o se Loia ma sa agai lana saunoaga i āuga o faiga sauā e tusa ai o le itu tau i le tulafono, ma le auala e mafai ona puipuia ai nei faiga sauā mai le oo i le tulaga ua aafia ai loa le tulafono.
O le isi failauga autū, o le faafeagaiga, Susuga Soti Enari, o ia foi o se tagata Faufautua tomai i mataupu tau aiga. Sa talanoa Enari i suiga lelei e mafai ona oo i ai pe a saili o tatou aiga mo se fesoasoani e taofia le faafitauli.
Ona saunoa lea o le faafeagaiga, Susuga Elder Elama Maea, i tapulaa faa-Kerisiano ma vaega o le agaifanua, e pei o le fefaaaloaloai.
O se tasi o vaega na faia, o le vaevae lea o taitai i ni vaega toalaiti e talatalanoa ai i ni gaoioiga talafeagai e taofia ai faiga sauā, ma ia gaoioi o ni taitai mataalia i totonu o a latou ekalesia.
O loo iai le faamoemoe, o le masina fou o le a faailoa atu ai e faifeau o le pulega se lipoti mai lenei faatasiga i aulotu a le matagaluega a Ueligitone (Wellington Regional PIPC) ina ia malilie faatasi i se fuafuaga ua uma ona faataatia a le ekalesia.
O le isi vaega o le a sosoo mai o lenei polokalame, o le a taulai atu i fanau talavou poo le tupulaga lava o loo i totonu o Ueligitone.
O nei polokalame faagasolo ua faatupeina e le Matagaluega o Atinae Lautele.