“E na o turisi e taga ona taaalo” Tuilaepa
Ua mae‘a ona soalaupule e le palemene i lona faitauga faalua le tulafono taufaaofi o le a tatala ai ona faagaioia i Samoa fale mo taaloga faitupe poo kasino, lea o loo popole i ai nisi o le atunuu aemaise o ekalesia.
Faaalia e le Palemia i lana faamalamalamaga i le fono aoao o le tulafono taufaaofi e faapea o se taumafaiga lea a le Malo e saili ai tupe e faatupe ai taaloga eseese i le atunuu aemaise lava o taaloga faavaomalo e faia mai i Samoa.
O aiaiga foi o lea tulafono taufaaofi o loo faasa ai se tagata o le atunuu ona ulufale i ia fale mo taaloga fai tupe se‘i vagana i latou e umia tusifolau o isi atunuu e malaga tafafao i Samoa.
O se tasi o mafuaaga o lea tulafono e pei ona saunoa le taitai o le Malo, o le siitia ai lea o tupe maua mai le atinae o turisi.
O finagalo faaalia o sui faipule o le Palemene na iloga ona finau ai faipule o le itu agai poo faipule tutoatasi ina ia toe silasila le Malo i le tulafono ona o popolega i le aafia ai o alamanuia tau tupe a aiga.
Peitai na faapupula atili e le Palemia e ana le tulafono tau faaofi e le faatagaina ai tagata o le atunuu ona ua silafia e le Malo le faaono avea ma avanoa e lamatia ai tupe maua a se tagata faigaluega, ma alu uma ai i le kasino ae le tausia le aiga.
“E faamanatu atu i sui mamalu e tapu i le tulafono o tatou tagata, seiloga o i latou e umia tusifolau o isi atunuu e malaga mai ma nonofo i faletalimalo”.
E manino i le folasaga a le Palemia ua na o tagata tafafao poo turisi. Peitai e iai tagata Samoa e ta‘i lua tusifolau ma e ono mafai ona ulufale i se kasino e taalo ai.
O le a toe silasila le komiti faapalemene o le a iloiloina le tulafono taufaaofi i lea tulaga ona toe avatu ai lea o se fautuaga i le Palemene.
O le sui faipule o Aiga i le Tai, le afioga Mulipola Oliva na ia faamanatu i le Palemia ma le faigamalo, aafiaga o tagata Samoa i Niu Sila ona ua alu tupe i le kasino ae faaletonu ai le tausiga o o latou aiga ma le totogia ai o pili o le eletise ma le suavai aemaise o le totogi o fale o loo nonofo ai.
O loo fautuaina e Mulipola Oliva le Malo ia tutumau ai pea i le faasa ma tapu o tatou tagata ona ulufale i kasino, aua o loo popole ekalesia i le alu uma ai o tupe ae le faia ni taulaga ma tupe lafo masani mo le lotu.
O loo iai le talitonuga o nisi sui faipule e ono mafai ona faataga tagata i Samoa i le kasino pe a oo i se isi vaitau i nisi faigamalo ua toe teuteu le tulafono ma tatala ai loa le avanoa.
Ua na o faletalimalo tetele o loo faataga i le tulafono ona faagaioia kasino ae o loo iai foi fautuaga a nisi faipule ina ia faataga faletalimalo uma ona faia ia taaloga fai tupe.
