“Sa fai lelei e lo‘u aiga ma ou alofa i ai, ae ua na tui lo‘u patua i le sapelu” …Greg
E faamomoiloto le molimau a le alii o Greg Alalatoa sa faigaluega i le pisinisi faaliliu tupe ma tala ai tupe o le Samoa Foreign Exchange, ina ua ia faamatala i le faamasinoga le mea na tupu, ina ua ia ave le $10,000 tupe Amerika i le alii o William Emanuel Okoro mai Nigeria i le aso 4 o Iulai o le tausaga na te‘a nei, 2009.
Na faamatala Greg i lana molimau e faapea o le faaiuga o le tausaga e 2008 na uluai feiloai ai i le alii Nigeria o loo molia i le gaoi ma le faia o se gaioiga tau faasese na ia maua ai lea seleni tele.
Faaalia e le molimau na amata ai mai le taimi lea ona la masani ma le alii o William, ina ua alu atu soo i le latou ofisa e tala ai ana tupe mai fafo ma faaliliu foi ana tupe.
O le la masaniga lea na pei ai lava na avea ai ma uo mamae ia te ia. “Na ou ave i lo‘u aiga ma fafaga e pei o so‘u lava uso, ona o lou alofa i ai o se tagata e leai sona aiga i Samoa ma o se tagata mai se isi atunuu”, na faamatala ai Greg i lana molimau.
Peitai na ta‘ua e le molimau, o ana faiga lelei ma lona toalua faapea lona aiga, ua le tusa ai ma le mea na faia e lē ua molia ia te ia, na matua mafatia ai lona aiga. “Sa fai lelei e lo‘u aiga ma ou alofa i ai, ae ua na tui lo‘u patua i le sapelu”, o le faamatalaga lea a Greg i le faamasinoga.
Sa na o le lulu o le ulu o le alii Nigeria ma pulatoa i le molimau. Na faamatala Greg o le la faigauo mafanafana lea na faailoa atu ai e lē ua molia lona naunau e faia sana pisinisi i Samoa.
Na iu ai lava ina fai atu ia te ia e manao i se 10 afe tupe Amerika, ae a maua muamua atu le seleni ona faatoa tuu ane ai lea o le tupe Samoa o le faaliliuga o le tupe Amerika (exchange currency).
O le alofa tele o Greg i le alii ma lona manao na ia faia ai se auala e maua ai le tupe.
O le aso lea sa tuu ai le vaaiga o le ofisa ia te ia ina ua faagasegasea le tamaitai pule.
Sa ia valaau ai i le tamaitai pule ma tau i ai, e iai se tupe e sefulu afe Amerika o loo manaomia e le kamupani telefoni o le Digicel, ae o loo manao vave i ai, ae mulimuli avatu ai le tupe Samoa mo lea tupe liliu.
Na ioe i ai le tamaitai pule ona e faapea o le Digicel o se kamupani e le mafai ona tuai pe faatamala i le latou faiga paaga faapisinisi i tupe e fia liliu.
Peitai o le tuugatala a Greg ma William na faaiuputa.
O le la tuutuuga a maua loa tupe sefulu afe e le alii Nigeria, ona alu loa lea e faatumu pepa i le Central Bank e mafai ona aveese ai le seleni ma Samoa, ae o le taimi foi lea o le a foi ane ai ma le $27,000 tupe Samoa mo le kamupani o le Samoa Foreign Exchange.
O le ‘afa o le valu i le taeao na tuulima ai le sefulu afe i le alii o William ma lana tala e ta le afa o le sefulutasi i le taeao lava lea (4 Mati 2009) ua toe foi atu ma le tupe Samoa.
Na faamatala le molimau, na vili ane le alii ma faailoa ane ua toeitiiti lava oo i le faletupe tutotonu o Samoa e faatumu pepa ona alu ai lea. Peitai na ta‘ua e Greg na fiu e faatali lana uo ua le toe foi atu. Na faia ana sailiga ma lona popole ona ua iai le mea ua tupu, ua mamulu le sefulu afe Amerika.
Na faia ana sailiga ma vili ai i le tamaitai pule e logo i ai le mea na tupu. O le Aso Toonai na faaalia i le molimau a le tamaitai pule o Lily Lam, na ia maua ai se telefoni mai le alii o Greg ma logo atu le mea ua tupu ma faailoa atu ai, e le o se tupe na manao i ai le Digicel, ae o lana uo o William.
Na faaalia e Greg i lana molimau, na oo lana sailiga mo se fesoasoani i le alii Palemia i lona fale.
Na maua ai le fesoasoani na saili ai lona avanoa e malaga ai i le Polenisia i Tutuila, ina ua ia maua molimau o le aso lea na faia ai le la tuugatala ma ave le tupe i lē ua molia, na alu ese ai ma Samoa i le malaga a le Polenisia mai Fagalii mo Pago Pago i le 12 i le aoauli.
Na taunuu i Tutuila ma faia ana sailiga ma maua ai le nofoaga o loo iai lē ua molia ae sa le mafai ona faia se auala e aumai ai i Samoa.
O le gaioiga a leoleo na fesootai ma leoleo ma le FBI i Amerika Samoa na toe faafoi mai ai le alii o William ma faia loa i ai suesuega ma molia. O loo tetee lea alii i moliaga.
O ana fesili na faia i molimau a leoleo aemaise o lona tu‘i i fesili o Greg na oso ai le fiva ma le lē fiafia o le Faamasino, le afioga Tauiliili Harry Schuster.
Na faatonu e le Faamasino le alii e tuusao ana fesili i vaega o le molimau ae lē o le taamilomilo solo ma ta‘u fua mea e lei afea i le molimau tuu fofoga a Greg Alalatoa. Na ia teena sa iai se la uo ma le molimau ona na te leiloa le alii o Greg.
E leai sana loia ae o loo tu lava ia mo ia e puipui lona tulaga mamā mai moliaga.
Mae‘a faamasinoga – solofua moliaga
O se tala lata mai la lenei e tusa ai o tolaulauga a le Faamasinoga Faaitumalo i moliaga o le alii Nigeria o William Emanuel Okoro, ma ua le faamaonia ona moliaga.
E lei mae‘a ona valaau molimau e ono a leoleo ae faamalieina le faamasinoga i molimau e lagolago ai moliaga. Peitai ua mafua ona taunuu le faamasinoga i lea faaiuga e ui ua talia molimau na tuuina atu, ona e iai se vaega faaletulafono o moliaga na faia e leoleo e le o faamalieina ai le faamasinoga e tatau ai ona faamaonia tuuaiga e aunoa ma se masalosaloga tatau (prove beyond reasonable doubt).
O lea tagatanuu Nigeria na faafoi mai e le FBI ma leoleo i Amerika Samoa ina ua ia tuua lo tatou atunuu ina ua ia taulimaina le sefuluafe tala mai le pisinisi o le Samoa Foreing exchange.
O loo silasila nei leoleo i le toe apiliina o le faaiuga i se taimi vave a o lei tuua Samoa e lea alii, e pei ona faaalia mai e se loia a le Malo.
