“Ua avea matou ma mamoe e osi ai le taulaga” Lealailepule Rimoni
E mausali le talitonuga o Palusalue Faapo II ma Lealailepule Rimoni Aiafi, na mafua ona teuteu le tulafono o faigapalota ma faamausaliina ai le tutumau o faipule i o latou tulaga aloaia i le avea ma faipule tutoatasi poo le lesitala i se vaega faaupufai, ona o le faiaina ma le toilalo popo o le faigamalo a le HRPP i le faamasinoga na ave ai e le Tautua Samoa le faaiuga a le Fofoga Fetalai ina ia soloia nofoa uma e iva o le Tautua Samoa.
Ua silafia e le au faitau le mafuaaga o lea faaiuga ma le faamasinoga na faatumauina ai pea tofi faipule o sui o le Tautua Samoa party.
Ua faamamalu nei le malosiaga o le teuteuga o le tulafono mo faigapalota ma ua le mafai ona toe faatino ai talaiga a le Tautua Samoa mo le palota o le tausaga fou.
Ua le mafai ai foi ona feiloai ma tusitala ma faailoa o latou finagalo o ni sui o le Tautua Samoa, ma ua mafua ai ona faia le faaiuga a le faipule o Faleata i Sisifo, le tasi o sui o nofoa e lua o Safata, ma le sui faipule o Vaisigano Numera Tasi, ina ia tuua o latou tofi faipule ma nofoa i le palemene, ae foi e faatino a latou palota laiti e ala i le toe fesiligia o o latou itumalo faafaipule.
O le aso 10 o Mati 2010 na amata ai ona faamamalu le Vaega 5 o le teuteuga o le tulafono o faigapalota, ua loka mau ai faipule i o latou tulaga aloaia faapea le teuteuga o le Vaega 46 o le Faavae, ua mafai ai ona soloia se nofoa o se itumalo i le palemene pe a le usitaia lea aiaiga.
O le mafuaaga lea o le avanoa o nofoa o itumalo e tolu e pei ona faailoa atu. Faaalia e Lealailepule sa feiloai ma le Fofoga Fetalai i le Ao Lua, 16 o Mati 2010 lea na ia faamatalaina o se feiloaiga faatamalii.
Sa faailoa atu ai e le Fofoga o le fono i lea feiloaiga, le faamamaluina o le Vaega Lima o le tulafono o palota, ma na faailoa ai lava e Lealailepule ma Palusalue i le feiloaiga lea, o laua e tumau lava o sui o le Tautua Samoa.
O isi faipule e toafitu o le Tautua Samoa na suia lo latou avea ma faipule o lea pati ae avea ma sui tutu toatasi, seia aulia le taimi talafeagai e faailoa ai lo latou avea ma sui o le pati pe a latalata i le palota o le tausaga fou.
Peitai ina ua faasilasila e le Fofoga Fetalai le avanoa o nofoa o Faleata i Sisifo ma le isi nofoa o Safata, na tulai ai le faipule o Vaisigano Numera Tasi, afioga Vaai Papu ma faailoa o ia le isi e lagolagoina le Tautua Samoa.
Na ia faailoa ai foi lona tuua o le nofoa o le itumalo ae foi e faatino lana palota laititi.
“Ua avea matou ma mamoe e osi ai le taulaga”, o le finagalo lea o Lealailepule Rimoni i se feiloaiga ma tusitala.
O lona finagalo, e latou te amanaia ma aloaia le tutumau pea o isi o latou sui o ni faipule tutoatasi ae o sui lava o le Tautua Samoa, ae o le a foi e faatino palota laiti e avea ma ‘ai o aiaiga fou o le tulafono.
“Matou te mananao ia silafia e le atunuu le ogaoga tele o lenei teuteuga, ae o le a matou lē toe solomuli ai i le matou faaiuga”, na toe saunoa ai Lealailepule. E lei iloa se aso e faia ai palota laiti.
Na saunoa le Palemia i le maota fono, ma faafetaia le faaiuga a sui faipule ona ua iloa ai lo latou loto tetele ma le loto totoa, ona e le o toe mamao se taimi mae‘a le paeaiga o iai nei a le palemene, ae ua latou usitaia lava aiaiga fou o le tulafono.
E manatu le Palemia, o suiga ua faia i le tulafono o le maopoopoga lea o le palemene ma faigamalo a le atunuu i le lumanai.
O se suiga foi ua tauleleia ai se galuega ua faia e le peaiga o iai a le fono aoao faitulafono. “O outou māmā na”… na saunoa ai Tuilaepa.
