O foliga faatafunaina o matafaga i Lalomanu Aleipata sa sili ona afaina i le sunami o le aso 29 o Setema o le tausaga ua mavae 2009, e le talitonu ai le vaai o sulu o le tino, ina ua toe asia i le tuanai o le lima masina talu ona tulai mai lea faalavelave faalenatura. Sa maimoaina e lo tatou atunuu o aumau ma alala i fafo vaaiga matautia i matafaga i Lalomanu sa iai faletalimalo tu matafaga poo beach fales.
O le Aso Toonai, 13 o Mati 2009, na afea ai e le tusitala le vaega o le matafaga lauoneone paepae e lolofi ma tosina i ai loto o papalagi tafafao mai fafo, ma maofa ai i le tulaga ua toe vaaia i le faletalimalo o le Taufua Beach fales.
Ua toe fausia lava le vaega sa iai le faleaiga i le tulaga fale sa iai le faleaiga na faaleagaina e le sunami.
O loo tutu ai lava ma laau o le talie e iloa gofie ai le faitotoa i totonu o le faleaiga.
O le anofale foi o fale Samoa ua sui o laupapa fou ua fausia ai ae o foliga lava ia sa iai le fale Samoa muamua.
E taunuu le tusitala o loo tumutumu ai tafaoga ma taelega a turisi e aofia ai ma nisi o lo tatou atunuu o loo malolo atu mo se vai malulu poo se ipu kofe faapea se taumafataga mai le faleaiga a le Taufua Beach fales.
O foliga sagisagi ane o le au faigaluega, na iloa ai ua le toe iai ni mafatiaga o le sunami aua o nisi lava o le afioaga o Lalomanu o loo faigaluega i le faletalimalo.
Fai mai se tasi o alii e vaaia le faleaiga, na maea le fausia o fale i le masina o Ianuari o le tausaga nei 2010.
E oo ane i le masina na tea nei o Fepuari ua le ofi fale i le fia maua o ni avanoa o tagata tafafao mai fafo e nonofo ai.
O se molimau faafiafia loto lea i le asia ai e le sui o lenei nusipepa o lea vaega o le atunuu sa sili ona mafatia i le sunami.
O nisi o faletalimalo tu matafaga poo beach fales e sosoo ma le Taufua Beach fales, o loo amata ona toe fausia. O se isi vaega e lei gaioia lava se mea e tasi ona o loo faatali i le taimi e maua atu ai fesoasoani tupe ua ofoina mai e le Malo o Niu Sila mo le toe faaleleia o a latou pisinisi.
O le toe tatala ai o le Taufua Beach fales o se mitamitaga lea o nisi o le au faigaluega, aua sa motusia le tupe maua ina ua faaleagaina i le sunami, ae o le toe tatala ai o le faletalimalo o lea ua toe maua ai galuega ma ua toe uu ai foi nai seleni mai totogi e maua.
