Ua faafiafiaina le Malo ina ua tafa le finagalo o alii ma faipule o le afioaga o Lepea, ua mafai ai ona faalautele se vaega o le alatele o le Malo o loo aafia ai se vaega o le malae o le nuu.
Ua 4 tausaga o faalavelavea le mataupu i le galuega o le auala, ae tasi lava le tali a le nuu, o le leai.
O le ituala i tai sa iai le maliega o le nuu e faaaogā, peitai na faaalia e le taitai o le Malo i le alii Palemia, Susuga Tuilaepa L Sailele Malielegaoi i se feiloaiga ma matai o Lepea i le masina na tea nei, e le mafai ona faaaogā le ituala i tai ona e le sagatonu ai le auala i le fua ua mae‘a ona faataoto e alii inisinia o galuega tau auala.
O le Aso Lua, 16 o Mati 2009, na feiloai ai le afioga i le Minisita o Galuega, Tuisugaletaua Sofara Aveau ma matai o le afioaga ma faailoa ane ai loa le ioega a Lepea e faaaogā loa le vaega o le malae e faalautele i ai le auala.
Faaalia e le minisita, o se fiafiaga lea o le Malo ua mafai ona masuiga mālie le mataupu ma ua iai le suiga o le finagalo tetee i le ioe mai o Lepea e faatino le fuafuaga a le Malo.
O le tau tau tupe o eleele o le nuu o le a faaaogā o le a taatia mo le taimi nei ae sei faasolo muamua le galuega ae e iai se taimi ona soalaupule lea ma faatino lea tulaga.
O le pā sima a le nuu o le a aveesea o le a toe fausia e le Malo, e pei ona saunoa Tuisugaletaua Sofara Aveau, o le fuafuaga lava sa iai i le amataga o le fau e le Malo o le pa a le nuu ona sa alu ai a latou seleni ile fausiaina.
O le a laina tutusa nei le vaega o le auala o loo i Lepea ma le vaega o le alatele ua maea ona faalautele ma o le a maua tonu ai le alasima ua maea ona toe fausia ma faalautele o loo i Lepea.
O le tofa Vaitagutu Viliamu Masoe ose tasi o matai faiupu o Lepea na ia faailoa i tusitala le agaga fiafia o le nuu ona iu le finauga ma le Malo ile eleele o iai le malae e aunoa ma se soifua e aafia.
O lona finagalo na ia ta’ua ai o le agaga o le nuu ia lagolago pea soo se taumafaiga a le Malo mo le lelei o tagata uma.
O lea la ua mautu ma masuiga lelei le mataupu ile aualatele, ae o loo talia pea se aso ma se taimi o le a toe faamautu ai le tofi Pulenuu o le afio’aga e totogi e le Malo, aua o le tasi lea to’a o loo ilitata ai finagalo o le nuu.
