O se alii sa galue o se faiaoga i se tasi o Kolisi a se Ekalesia i le talafatai o Apia na faatea i le vaiaso na tea nei ona o le maua ai ua fai le faanunumi ma se teine o le aoga.
O lea teine sa aoga i le alii faiaoga lea i le Vasega 12 na aafia i le faanunumi lenei ma o le alii faiaoga e fai lona aiga ma lana fanau.
O le faamatalaga ua leva ona fai le faigauo a le faiaoga ma le teine o lana vasega ae sa leai lava se isi e laga lenei mataupu seia oo ina maua i le potu aoga.
O le suesuega la a le Kolisi lea ua fa’ate’a ai lenei alii faiaoga. Sa fesiligia poo se tasi e iai se tofi i totonu o le ekalesia lea ua faiaoga ai i lana a’oga peitai o le lipoti ua oo mai, o se alo o se faafeagaiga o le lotu lea e ana le Kolisi lea na galue ai.
O le teine a’oga ua faapea fo’i ona alu ese mai i le Kolisi lea ae ua aoga nei i se isi kolisi i totonu lava o le talafatai o Apia.
E le o le taimi muamua lenei ua tulai mai ai ni faanunumi faapea ua aafia ai faiaoga ma teineiti aoga ae o le mau a faauluuluga o Aoga e matua le toe talia lava nei ituaiga faiga ma o sauaga nei ua faia faasaga i fanau teine e tuua‘ia lava le tagata matua.
Sa iai lipoti na faapea mai o le teine aoga na ma‘ito i le faiaoga peitai e lei faamaonia mai e le aoga lea tulaga. Ona pau le faamaoniga ua faatea le faiaoga ma ua faatea foi le tamaitai aoga.
O le tausaga lenei e sue ai le School Certificate, Tusipasi faaleaoaoga o le tamaitai aoga lenei ae o lea ua faatulai ese ma ua agai nei i le isi kolisi i le talafatai lava o Apia auā le faauma ai o ana aoga mo lenei tausaga.
