E aoao manogi mo le lolo, e faapena le agaga na lagona i le Aso Toonai aso 21 o Iuni, ina ua fuifui faatasi i le futiafu e tasi le malaga mai Samoa a le afioga i le peresitene o le Samoa Victim Support Group (S.V.S.G.) le faletua ia Lina Chang ma nisi o sui mai Samoa, faapea foi sui o le faalapotopotoga mai le aai o Sini.
O le faamoemoe o le faatasiga e pei ona faia i le aai o Melepone, ina ia faalauiloa ma folasia i le mamalu o le atunuu le faamoemoe ma le sini autu o le faalapotopotoga o galue ai ma fesoasoani mo ē o puapuagatia i Samoa.
E pei ona lē o toe po Malae i le silafia o le atunuu, le anoanoai ma le tele o le aogā o lenei faalapotopotoga mo tagata o sulufai ane mo se toomaga. Na leai se fofoga e mātū ina ua folasia ma faailoa e Lina nisi o galuega fai ma fesoasoani a le SVSG mo nisi o fanauiti ma alo tamaitai o le atunuu, aemaise le tele o tina ma tamaitai ua mafai ona faasaolotoina mai sauaga ma amioga matagā.
Na folasia foi e le taitai ma nisi mai Sini le tulaga ua iai lenei faalapotopotoga i le aai o Sini, ua lua nei tausaga talu ona faasavali, ma ua amata ona vaaia le tāua ma le aogā aemaise lava foi o le soosootau‘au ai ma le ofisa tutotonu i Samoa.
O se tasi o vaega o le saunoaga a le peresitene, o lona faailoa lea o le tele o fesoasoani o loo faatupeina ai le tautua e solo mai atunuu i fafo, o le toatele foi o tagata faigaluega o loo ofoina o latou taimi e fesoasoani ai e aunoa ma se totogi.
O le maitau a le Samoa Times, o le toatele o le mamalu na autovaa atu i lea aso, ua fulisia finagalo mo se auaunaga faapenei ina ia faatinoina i le aai ma soosootau‘au ai ma le ofisa o le Toomaga i Apia. Na saunoa faafetai Papaliitele Lafulafu Peo, e faafetaia le fita i tuga o le Toomaga, ma faaiu ai i le tatalo.
O le a faatali ia i le Lagi se Toa e tulai na te tauaveina le anavatau e fai ma Toomaga mo ē Puapuagatia i Melepone.
