O loo faaauau pea ona sasaa e le malo tele o Ausetalia avanoa i ona Setete uma e galulue soosoo tau‘au ai ma le tele o faalapotopotoga eseese, o loo toe aoaoina ma faalautele le silafia o tagatānuu o loo toe fia maua ni Tusipasi ae ua lē mafaia i le itu tau tupe.
E ui la ina e na o tusipasi 3 ma le 4 (Certificate 3 & 4) a o amataga lelei nei e toe fuatai ai le lumanai, ae o le itu sili o nei aoga e faia fua i fesoasoani ia a le malo. O se tasi o tamalii Samoa ua afu lana tautua i le momoli maia o nei fesoasoani mo le mamalu i le aai o Melepone, o le susuga lea ia Ronnie Logova Toomata.
O loo tautua Ronnie mo le Iunivesite o Matata Eseese o loo mafai ai ona o latou aoaoina le Igilisi, Komepiuta, Pisinisi ma le tele o nisi mataupu. E silia ma le 15 aoga o loo faasavali e le susuga ia Ronnie ma ana lagolagosua i le aai, ae o le vaiaso na tuanai atu i lona Aso Faraile na faauu ai ma tauaaoina tusipasi o nisi o tamalii i le pitonuu o Tullamarine, lea na faasavali e le EFKS pei foi o aoga uma o Ekalesia eseese o loo faataunuu ai.
Na maua se faatalatalanoaga ma le susuga ia Ronnie ma ia saunoa ai, o loo tele pea avanoa mo le paia lasilasi o Samoa, ma e lē afaina le matua ma le soifua aoaoina sa iai, ae mafai lava ona o latou fesoasoani i soo se tamalii poo alo ma fanau.
