O le tagata ma lona Tupuaga, o le tagata ma lona Faasinomaga. O le tausaga e 1897 na amataina ai le Lotu Faamanatu a le auaiga o ULU i le afioaga o Toamua, lea ua 117 ai nei tausaga. O le tausaga fou e atoa i ai le 50 tausaga talu ona amataina i Niu Sila, ae viia le Atua o lea ua amataina i le aai o Melepone i le Aso Toonai na tuanai atu, aso 28 o Iuni. O le malumalu o le EFKS i Dandenong ma lo latou faafeagaiga le susuga i le toeaina ia Viliamu Finau na taitaia le sauniga lotu, o talosaga na momoli e Lupe Faalele a le aiga alii le susuga ia Sila Samani, Fiaalua‘e Tiata ma Leao Tuasivi, a o tapuai le susuga i le Toeaina Malolo Manunalo ia Urika Saifoloi ma le faletua ia Oomi.
O viiga na peseina lava e alo ma fanau ma le lasilasi o le aiga. O le tala o le amataina o le mafutaga i Melepone na saunoa i ai le faletua ia Moana Samani, ae o le tala otooto o le gafa o le aiga sa ULU ma le tala i le Lotu Faamanatu mai lona faavaeina, na saunoa i ai le afioga i le Sa‘o le tofa ia Ulu Vaomalo Ulu Kini na malaga mai Samoa, ma molimoli ai ma le faaaloalo o le Ie o le Malo e fai ma faamanatuga i le taitai sauniga.
le mae‘a ai ona momoli laau i Fogaa, ona alo lea i le taumafataga ma silamaimoa foi i nisi o faafiafiaga a alo ma fanau. Na faaalia foi pelega o aiga e ala i faaaloaloga faaleatunuu mo le aufaigaluega paia aemaise o le Ekalesia a le susuga i le Toeaina, sa fai ai le fofoga o Falemalietoa Risati ma sui o le aiga.
O le fofoga o Asiata o le aao tusitusi lea o le Ekalesia i Dandenong le tofa ia Ponausuia Taai na tali fuaitau e pei o faiva o le Faleupolu o tofiga.
Na mae‘a ona saunoa faamanuia lea o le Toeaina Malolo Manumalo ma faapaia ai i fuafuaga faataotooto a si o latou aiga, ona saunoa lea o le Sa‘o e faafetaia le taulagalaga a si ona auaiga i Melepone ma faamatafiina ai e le taitai sauniga.
Na maitauina le sagisagi fiafia ma le feoeoeai o le auaiga atoa faatasi ai ma le agaga faafetai ona o nisi na lē silafia le ala e tau ai i le Aiga sa ULU, ae ua manino le mata o le vai ina ua tolaulau le gafa ma iloa ai o toto, ivi ma aano moni. O se mitamitaga sili foi mo alo ma fanau a le aiga ona o lea ua amata iloa lo latou Tupuaga. Ia manuia laasaga uma o le aiga. “O la outou lotu Faamanatu, o le Vaa lea o le Faaolataga mo augatupulaga o fai mai.”
