Ua atoa nei le numera e toatolu o Sui o le Fono a Sui Tofia o loo aiaia i le faavae o le Malo Tutoatasi o Samoa, ina ua faatauto afioga i Sui o le Fono a Sui Tofia poo Sui Ao o le Malo e toalua na filifilia e le vaega faaupufai o le HRPP ma faamaonia e le Palemene le afioga Le Mamea Ropati ma Tuiloma Pule Lameko.
O se sauniga foi na faatauto ai ma Pule Sili e toasefulutolu o nisi o matagaluega a le Malo. Na saunoa le taitai o le Malo le afioga i le Palemia susuga Tuilaepa Lupesoliai Sailele Malielegaoi ma ave le faamalo i tamalii ua filifilia e seei i nofoa e lua o le tofiga Sui o le Fono a Sui Tofia ona o lo la talia o le filifiliga a le Palemene.
Ua atoa ai nei le toatolu o sui Tofia o loo aiaia i le faavae. O le afioga i le Tama Aiga Tuimalealiifano Vaaletoa Sualauvi II, afioga Tuiloma Pule Lameko, ma le afioga Le Mamea Ropati Mualia.
O tofiga nei sa atoa foi le toatolu i se tasi o paeaiga ua mavae a le Palemene a o tulai mai le afioga Tofilau Eti Alesana i le tofi Palemia, lea sa filifilia ai le afioga Vaai Kolone, le afioga Faumuina Anapapa sa see toatolu ma le afioga Mataafa Faasuamaleaui Puala Patu.
Na sosoo foi ma le filifilia o le susuga Mata‘ia Visesio Europa, e atoa ai le toatolu ina ua tuumalo le afioga Mataafa Faasuamaleaui Puela. Ina ua tuumalo le afioga Faumuina Anapapa ma le afioga Vaai Kolone na filifilia ai le afioga Tuimalealiifano Vaaletoa Sualauvi II, lea na faamavae ma le Sui Tofia ina ua tauva i se tasi o faigapalota tele a le atunuu.
Peitai na toe finagalo le Malo ma le Palemene e toe filifilia i le Sui Tofia ma ia toe tauaveina ai le tofiga lea e na o ia sa seei mai ai seia oo ina filifilia i le amataga o le tausaga nei Minisita e toalua o le Kapeneta e faasee atu i ia tofiga maualuluga ma faaaloalogia o le Malo.
I le filifiliga o Pule Sili poo faauluuluga o Matagaluega a le Malo ua faatauto, ua tulai mai e toaiva Pule Sili o le taimi muamua lenei ua seei ai i nei tofiga e faakonekarate taimi galue e tolu tausaga ma toe faia le filifiliga.
O i latou e toaiva ua faatoa tofia e avea ma Pule Sili o le faletua le afioga Peseta Noumea Simi mo le Matagaluega o le Va i Fafo ma fefaatauaiga. O le afioga Peseta Margaret Malua mo le Matagaluega o Leipa, Pisinisi ma Alamanuia. O le faletua o Unutoa Auelua Fonoti, le faletua o Elita Tooala, le faletua o Avalisa Viali Fautuaalii, le faletua o Karolina Afamasaga Fuatai.
O isi faauluuluga o le taimi muamua lenei i le tofiga o le susuga Papalii John Afele Taimalelagi mo le Matagaluega o Faamasinoga ma Mataupu tau Faamasinoga, ma le tofa Agafili Shem Leo mo le Matagaluega a le Palemia ma le Kapeneta.
O i latou ua toe filifilia o le susuga Lavea Tupa‘imatuna Iulai Lavea mo le Matagaluega o Tupe, le susuga Tuaimalo Asamu Ah Sam mo le Matagaluega o Fesootaiga Faatekonolosi, ma le faletua o Naea Beth Onesemo Tuilaepa mo le Matagaluega o Tina ma Tamaitai Atinae o Nuu ma Afioaga ma Agafesootai.
Sa avea muamua le tina o le atunuu ma Pule Sili o le Komisi e Pulea tagata faigaluega a le Malo ae na faamuta ina ua aveesea lea tofiga ma le Komisi poo le PSC ae ua faauluulu i le Taitaifono o le Komisi e pulea tagata faigaluega a le Malo.
