O le ti‘a e lē seua ma le mua e lē fuatia. Ua motusia le asoa, ua lē soo le pale ma ua gausia le laau mafalā sa paolo ma faamalumalu ai le nofoaalo ma le aiga atoa, ae tainane le galuega a le Atua ma ua mānava galuega ina ua valaau le Matai.
O le toe luasefulu minute i le tolu (3:40am) i le vaveao o le taeao o le Aso Tofi, 4 o Fepuari, na faamanavaina ai galuega ma tuua le malo e le afioga i le faletua malolo manumalo Siniu Tupu Tuiā, o le alo e faasino ia Pulemagafa i Fagalii i le Vaimauga.
O ni lupe faalele mai Fagalii, Vaiee ma Tiavea Safata a faaipoipo atu i le susuga ia Tupu Tuiā, ma ofoina lo la soifua i le galuega a le Matai i le ekalesia Metotisi Faasinoti amata mai i Samoa.
Ua loaloa tausaga o galulue i le galuega a le Atua i Salepoua‘e i Saleimoa, Samusu Aleipata, Salelesi Anoamaa, Mt Roskill i Aukilani, ma Inala i Brisbane. O le la ekalesia mulimuli lea sa tatala ai ofutau o le susuga i le tausi matagaluega ia Rev Tupu Tuiā i le 1999 ina ua valaau lona Matai a o galulue i le ekalesia Metotisi Faasinoti a Kuiniselani Inala.
O nisi o toa o le talalelei ua momoe mai tiasā e faatali ai le aso e afio mai ai le Alii ma le alaga e faapea, “Le auauna lelei e ma le faamaoni, ulufale maia i le fiafia o lou Alii.”
O Siniu Tupu Tuiā o se tasi o Tina matua e tausaafia e le toatele o tagata i ona uiga tausaafia ma le laufofoga fiafia, ae sili ai le misia e le nofoaalo auā o loo tupu ma olaola le fatu na ia totō ua lauusiusi ma tosina i ai manatu ma lagona o i latou ma soo se tasi.
E maliu le tina malolo manumalo o loo galue pea le Ekalesia Metotisi a Akesa (Alegester). Pei ona iai le tauvaga pese i le 2013 na vaaia le filofilo i le aufaipese a o lagiina viiga o le Atua.
Ua faamoemoe o le Aso Lulu o le vaiaso nei o le a aumai ai lona tino maliu i tua i lona aiga, e sauni mo lona sauniga faaleaiga i le Aso Tofi ma ona toe sauniga i le Aso Faraile.
O le a vaavaalua ai le afioga i le Sea ia Rev Halafoti Seloti faapea le tausi matagaluega ia Rev Lei‘o Leilua o le tausi matagaluega a le faletua malolo manumalo ia Siniu Tupu Tuiā i ona sauniga i le po ma le taeao.
E maliu lenei toa o le talalelei ia Siniu Tupu Tuiā, ua savalia le 82 tausaga o lona soifua ma ua toafitu le nofoaalo, to‘a 36 grandchildren ae 45 great grandchildren (aofaiga o ē na tupuga mai le Tina matua, e to‘a 88 i latou uma).
O alo ma fanau e aofia ai Sola Pisa‘imalo Tupu Tuiā; Faamanatu Tupu Tuiā Seumanutafa; Maulupe Manase Tupu Tuiā; Pr Togamau Tupu Tuiā; Misileti Tupu Tuiā Tusa; Safata Tupu Tuiā Faaosofia, ma Dr Fua’ia’ialii Tagataese Tupu Tuiā mai Samoa (faiaoga i le Iunivesete aoao o Samoa).
Toe tepa i tua a o soifua le faletua manumalo ia Siniu Tupu Tuia ma le nofoaalo O sauniga uma o le a faia lea i le malumalu EFKS Puna o le Olataga Southwest Brisbane ma le taumafataga o le a feagai ma Uncle Sams Takeway (Poulava Sa ma Lona Matautia).
Sauniga: Faletua malolo manumalo – Siniu Tupu Tuiā
Sauniga faaleaiga – 4pm Aso Tofi 11/2/2016
Sauniga faaiu – 10am Aso Faraile 12/2/2016
Tuatusi: 228 Learoyd Road, Willawong 4110
(Puna o le Olataga & Tiafau Hall EFKS Southwest Brisbane)
Ia manuia lau malaga Siniu Tupu TuiāAlofaaga e lē mavae ma faamaisega mai le nofoaalo ma tauaiga uma faapea alo ma fanau aemaise le ekalesia Metotisi Faasinoti Algester!
