Ua tauaao nei e faauluuluga o Aoga tumaoti ma aoga a ekalesia faapea aoga faataitai poo Preschools, aofaiga eseese o seleni ua faamanuiaina ai i le tufatufaga a le Malo mo lana fesoasoani e $6 miliona lea e faia i tausaga taitasi.
O se tufatufaga ua fetaui lelei le taimi ua faia ai ma le toe a‘e atu o aoga a le fanau e tele mea e manaomia ai tupe aemaise lava o totogi o faiaoga auā o faiaoga mo aoga tumaoti o aoga faataitai ma aoga a ekalesia e lē lavea i le totogi o faiaoga a le Malo.
O se tasi lea o meaalofa na siitia mai le lima miliona i le ono miliona i nai tausaga e lei mamao atu ona o le silasila a le Malo ua maualuga le manaomia o lea fesoasoani e aoga nei.
O le tuuina atu o nei vaegatupe ua maualuga ai foi le fesoasoani ua maua e aoga a le Ekalesia Katoliko e tasi le miliona ivaselau afe tala ($1.9miliona). Pito atu i ai le siakitupe a aoga a le ekalesia Faapotopotoga Kerisiano Samoa le EFKS e tasi le miliona 17 afe tala.
O aoga a le ekalesia Metotisi e onoselau ma ona tupu afe tala. E fua lava le tupe maua i le aofaiga o fanau o loo aoaoina i aoga eseese, e lē aofia ai aoga a le Malo. E iai aoga o loo taofia a latou seleni ona o le saunoaga a le Palemia e tatau ona tuuina atu muamua lipoti i le faaaogāina o isi seleni na maua i le isi tufatufaga talu ai, ona faatoa agavaa lea ona maua le isi fesoasoani.
O le tuualalo a le Malo i aoga e tatau ona faaaogā lelei seleni ae lē o le faaalu i nisi mea e lē fetaui ma le autu o le fesoasoani a le Malo.
O le faafetai na momoli e le susuga Vavatau o le Faatonu o Aoga a le EFKS ona o le molimau ola lea o le mamao o le silasila a le Malo i le atinae o fanau o aoaoina e aoga a ekalesia, o aoga tumaoti ma aoga faataitai.
O le faafetai auā o se tasi lea o toomaga o loo maua atu pea e fesoasoani i le utiuti o tupe o loo maua mo le faagaioia o ia aoga i le atunuu. O le saunoaga a le alii Palemia na taualuga ai le tufatufaga o seleni sa faia i le potu fono o le Kapeneta, e faaauau pea le fesoasoani a le Malo ma le naunautaiga ia maua e fanau a le atunuu le ola aoaoina ma ia atamamai auā o taitai o le atunuu i le lumanai.
