Ua tuufaatasia nei e ala i le sakalameta o le faaipoipoga, le susuga ia Aiulu Aiulu ma si ana manamea le tamaitai o Sāsā Tele‘a Aiulu. O lenei sauniga mamalu na faataunuuina i le Aso Toonai, aso 16 Mati, 2013.
O mātua o le alii faaipoipo o le tamā ia Si‘u Aiulu (Safaatoa Lefaga) ma lona tina o Otila Aiulu mai le alalafaga o Siuniu Falealili.
O tuaa o le tamaitai faaipoipo, o Faalii Tele‘a Mika mai Samata ma si ona tina ia Finau Mika mai Tufutafoe. Na taitaia le sauniga e le afioga ia Patele Epati Tamati o le Puleaga a le Ekalesia Katoliko i Kuiniselani.
Na taualuga foi i le taumafataga faapea valevalealofa o aiga na lua e ala i faaaloaloga auā le aufaigaluega ma le mamalu o le auvalaaulia. O le susuga ia Asiava Peni Tuipea sa fai ma fofoga o le aso. Na fai ma sui o Samoa le afioga ia Taito Tafa‘ioletagaloa Gale e molimoli le agaga faafetai i aiga na lua ona o faaaloaloga sa faasafua mo le aufaigaluega, faafeagaiga, afioga ia Patele ma le auvalaaulia auā na tofu le gogo ma si ana i‘a.
Na matuai faamalieina le galala o le fia taumamafa i le tautua matavela a le Uncle Sam’s Catering, le tofa ia Poulava Sam ma Lona Matautia.
Ia manuia le aiga fou Aiulu ma Sāsā, mai lua mātua ma aiga uma lava.
