O le tamā ia Moti Satuala o se tagata e lē tau faamatalaina pe a talanoa i itu tau faatoaga i le Motu o Salafai. O le tofa Moti Satuala e mai le afioaga o Neiafu i le Alataua i Sisifo.
Na faaalia manino e Moti e faapea, o le tupe o loo ia maua i le masina mai lana ‘ava Samoa e $40 i le $44 afe i le masina. Na maua se avanoa e asia ai e Sui o le Nusipepa o le Savali faatoaga a le tofa Moti Satuala.
Na molimauina ai le uigaese o le soifua galue o lenei tamā ua lē gata i le ‘ava Samoa a o le talo na matauina ai le lata i le 100 afe o tiapula i lona maumaga.
Na saunoa Moti e faapea, o si o‘u aiga o le gagau lava o le vao na afua ai ona matou maua uluai taavale.
“Sa taumafai mai lava i le amataga o a‘u ma le tina o le aiga e ui ina e lei faigofie ae sa iai lava le naunautaiga ua afua ai ona maua nei mea e tele.
“O le amataga lava o le maumaga o talo ma taamu niukini sosoo ai ma le ‘ava.
“E lei faigofie auā e leai se mea e maua ma se filemu aemaise ai o le mamao i uta o fanua.
“O le vaitaimi o iai le Kamupani a BP na ou uluai faatau mai ai la‘u pasi muamua i le tau e $34,000 pe $36,000 ua ou lē manatua lelei.
“O le taimi nei o lea ua lima pasi o le sipi mo le maumaga ma loli e lua o loo faaaogā e le Kamupani Ava malosi o le Vailima ma isi loli lea e tutu iinei.
“Sa iai le taimi na matuā lelei ai la‘u taamu niukini ma ou te talitonu e leai se isi i Samoa nei na mafai ona faafetoaia a‘u i lena taimi i le taamu niukini lava ia.
“E oo mai foi i le Ava Samoa, o lau kiliva e soo atoa ai Savaii ma Upolu, lea ou te maua ai le tupe $44 afe i le masina,” o le saunoaga lea a Moti Satuala.
Na ia faaalia foi e faapea, o loo auina atu ana taga talo i le konetaina lea e auina atu ai le talo i Amerika. E ova ma le 200 taga talo a le tofa Moti na auina atu i lenei konetaina.
Sa ia faamanino foi le tulaga faigata o feagai ma ia e ala i le atinae o le Ava Samoa, lea e faapea mai o le taimi sili ona faigata, o le taimi e tu‘i pe faamalū ai le ‘ava.
E $1,000 le tupe e tuuina atu e Moti i le Aumaga o le latou nuu i le tu‘iina o le ‘ava ae ese ai le tausiga e ala i meaai i le taimi e faatino ai le galuega.
E $7.00 o loo kiliva ai e Moti lana ‘ava i Upolu ma Savaii ae $10.00 o loo faatau ai e Faleoloa ma Faipisinisi.
