O le vaiaso na tea nei na umusaina ai (launched) se tusi ua faaigoaina i le Pacific Science: It’s in our DNA. O lenei tusi sa faatupeina mai e le Ofisa o Aoga le galuega o le faia o talanoaga ma tagata Pasefika ua iai i lea matata faapea foi ma tamaiti mai Kolisi i le itumalo o Ueligitone.
O le galuega (project) e lua tausaga ma sa faatautaia e le faiaoga ta‘ita‘i o Louise Falepau ma Maugana‘i Tiketi Auega, o ni faiaoga Samoa o le Politekinika o Whitireia.
O le tamaitai o Marisa Borrill na tusia le faavaa o ata o le tusi (designer), a o Laura van Peer na teuteuina ma faasa‘osa‘oina le gagana o loo i le tusi, ae o le isi alo o Samoa ma Tonga o Kalolaine Vaipuna na faia le faatalanoaina o tagata Pasefika ma tusia a latou faamatalaga.
O i latou nei mai le Pasefika o loo ua faamanuiaina i le itu faasaienisi ma ua lelei galuega o feagai ai: Namulau‘ulu Pune Brown o se tamaalii o Samoa, o le inisinia o auala, Dr Teariki Faireka o le Atu Kuki o le foma‘i mata; Dr Palatasa Havea o le Toga, o le suesue sinia i itu tau tekonolosi; Isaac Isaako o se alii aoga i le fesoasoani mo ma‘i i le Ambulance; o Sipaia Kupa o se Tokelau, o se faiaoga i fomai tausi ma‘i.
O le alii o Faasalele Malo o se alo o Samoa, o le alii tusiata o fale (architecture); Dr Esela Natano o se Tuvalu, o se fomai mo gasegase i Porirua; o Dianne Sika-Paotonu o se Atu Kuki, o loo saili lona fomai suesue (PhD candidate for medical researcher).
O Nick Payne o le Atu Kuki o se avevaalele; ma le tofa ia Liufau Matini Lutelu Tanielu o se alo o Samoa na galue faainisinia i Samoa, na faasikolasipi i Papua Niu Kini, maua lona Tipiloma i le Fuafanua ma ua toe saili nei i le faailoga o le Bachelor in Engineering mo le faalauteleina lava o le silafia i lea matata tāua.
E lelei le faatau o sau tusi e faitau ai i nei alo ma tamalii o Samoa ma le Pasefika o loo ua faaeaina i lea matata o le faasaienisi.
O le mafuaaga o lenei galuega ma lenei tusi e lu‘i atu ai foi i tama ma teine o Kolisi ina ia faatāua lenei mataupu aoaoina, ona e lē toatele ni tagata Pasefika e fiafia i le
itu faasaienisi.
