Faamomoiloto ma faigata ona faagalo sauaga a le galulolo

E faigata i upu ona faamatala lagona nutimomoia ma lagona o le alofa. Talofa e, i matua tausi, o matua ma fanau, o uso ma tuafafine o nai tagata tafafao mai fafo, ua motusia faafuasei le mafutaga ona o le maliu faafuasei.
Le maliu e lei iloa e se isi poo le a le taimi o le a oo mai ai se mala faalenatura faapei o le mafuie na sosoo ma le galulolo ua na momotu le mafutaga i le ola nei, ma faatafunaina ai le nuu.
E, pe sa ta miti ea, pe se mea moni ua tupu, ona e le talitonu le vaai o mata i sauaga matautia a le galulolo!
O lagona ia e tau faamatala ai vaaiga faanoanoa i nuu ma afioaga o le atu Aleipata, faasolo atu ai i Falealili ma Safata, Lefaga ma Manono ua afaina meatotino aemaise o ola ma soifua o tagata ona o le faalavelave na taia ai Samoa i le toe 10 minute i le fitu i le taeao o le Aso Lua, 29 o Setema 2009.
O se taimi o le taeao faatoa ala usu a‘e aiga i le aso fou i feau ma galuega masani e aunoa ma se silafia o se faalavelave faafuasei o le a tupu.
O nai fanau aoga ua agai i faleaoga, a o nisi o loo i le fale o loo tapena. O nisi ua taunuu i faleaoga, ae vaaia loa le fotuai ane o galu tetele e le masani ona vaaia. Faaalia e se tasi o tama, sa faapea lava ia pe o sana miti lea vaaiga, ma le lilo ia te ia, e leai o le galulolo lea ua agai ane e faatino lona ma‘ema‘e.
E leai se isi na iloa ma silafia le taimi na aumai ai lapataiga o le galulolo, poo fea tonu le vaega o le atunuu o le a afaina, aua na pau le tala na maua i luga o leitio faasalalau ina ua maea ona lulu le mafuie mo se umi pe lua minute, ia o uma tagata i nofoaga maualuluga.
O le tele o nuu i le atu Aleipata ma le faasolo ane ai i Lotofaga, sa le ano i ai aua e lei tupu muamua pe sa vaaia muamua se galulolo. Peitai o le molimau a le toatele sa fesilisili i ai le tusitala, na ona uma atu lava o le mafuie ae vaai atu i gatai ua pe faafuasei atu le tai ua ali uma amu ae sa sua le tai i le taeao lea.
E lei umi ni nai minute na vaaia ai le tulaga lea, ae silasila atu loa ua mapue mai se galu tele.
Na faamatala e nisi e pei e sausau malie lava, ma oso ai loa ma manatu o le galulolo lea sa faalogoina i le leitio o sau ai lapataiga.
Na nanati atu e saili poo fea nai fanau, ma faanatinati le tamomoe agai i se nofoaga saogalemu, peitai na maua atu lava nisi o loo taumafai atu i ni nofoaga maualuluga.
O nisi na taumafai e saili nai o latou matua tausi ma tauvalaau solo i isi sei alolofa ane, peitai na tuai ia gaioiga ae ua oo ane le galu muamua.
Na vaaia o loo tafefea solo nai fanau ma feei ona o le mau a nisi, e le malosi tele le galu lea na muamua ane.
Peitai a o tau maua pea se ola o nisi i lea taimi, na vaaia le toe faafao ane o se isi galu maualuga ma lapoa atu ma o le taimi lea e lei toe mafai ai lona ona saili poo fea nai fanau ma matua tausi, faapea isi tagata o aiga, ae ua lotulotu loa le tagata na maua si avanoa i lea taimi e sue se lafitaga e malu ai.
E lei umi masalo o se lima minute poo le itiiti foi ae toe maui atu le galulolo, ae vaaia loa ua taatitia mai tino maliliu o fanau ma nai matua ma isi tagata o aiga.
O sailiga na muamua oo ane o tagata lava o nuu ma afioaga na aafia na faatinoina, a o taumafai ai i lea lava taimi galuega fesoasoani.
O le faaletonu na tulai mai ua poloka le alatele i le otaota ma ogalaau, ma nisi vaega ua malepe i le galu. O se isi lea faaletonu na tuai ai ona taunuu ni fesoasoani mo le aumaia o nisi na manunua tigaina.
Sa sili ona tigaina nisi sa aafia i manuaga ona o le tele o apa ma laau faapea laupapa na vivili e le galu ma maua ai nisi o tagata na tafefea solo ma feaveai i le malosi o le galu.
O i latou ia na iu lava ina maumau soifua ona ua tuga manua ae ua tuai taunuu ni fesoasoani.
E le mafai ona faamatala e nisi tagata le vaaiga na iai le faalavelave, ae o le a faamatala e nisi na fesiligia nisi vaaiga na tulai mai i nisi o a tatou lipoti i le lomiga lava lenei a le Samoa Times (silasila i nisi o ulutala).