Faatofa ma faamavae atu i le toeaina Leao Tinetali Siitia Asi

O le toe fili na faaumatia e le tatou alii o Iesu Keriso i lona maliu ma lona toe soifua manumalo mai le tuugamau, o le maliu poo le oti.
O le ala lea o le faapea ane o le aposetolo o Paulo, O Iesu o le faapolopolo o e o momoe, aua o lona toe soifua mai le tuugamau, o le ata lea o le aumaia o se faamoemoe fou mo le tagata soifua, ina ia mautinoa e le mafai e le oti, ona faateaeseina i tatou mai le alofa tunoa o lo tatou Atua o loo ia Keriso Iesu.
O le oo mai o le oti e matuitui ma tiga, peitai a tatou tepa taulai pea i lo tatou Alii ma le ata ua maea ona ia tapenaina, ona tatou maua ai lea o manatu fou ma lagona fou, ona liua ai foi lea o le faanoanoa i le fiafia, ma le fememeai i le faamoemoe mausali.
O le oo mai o le maliu o se fafagu taua tele lea mo i tatou o loo soifua pea ma ola i lenei lalolagi, ina ia tatou ola sauniuni, ma manatunatu loloto, aua e iai foi o tatou taimi faapea, e tatau ai ona tatou mautinoa a oo mai le valaau a o tatou iai i aao o lo tatou Faaola.
E mautinoa o le isi vaega tele o le soifua auauna o le toeaina malolo ia Leao T Siitia Asi, e ese mai a ii le taimi sa tauaveina ai le galuega a le Atua, o lona taumafai lea e galue malosi e faafeiloai manaoga o nisi tagata.
E le gata i totonu o lona lava lotoifale faaleaiga, ae faapea foi fafo atu o le siosiomaga i tagata lautele o le faapotopotoga o tagata, aemaise lava foi i tagata o lona lava atunuu.
O le galue mo isi o le tasi foi lea o vaega o le soifuaga e seasea lava ona maua e tagata uma, peitai e le fesiligia le iai o lea meaalofa i lea tama.
O se ata e le manatu faapito, ma le taofiofi mamau i se mea, ae fiafia tele e faasoasoa atu ona agavaa ma ona manatu lelei, atoa ai ma le matagofie o le Atua i lona soifua, ina ia aiāina ai finagalo ma loto o isi uso a auauna, ma tagata lautele.
Atonu o le a mavae atu, ma le toe vaaia ona foliga sa faaali ai le fiafia ma le olioli e pei ona masani ai, peitai e le matineia ai pe o le a mou ese ai galuega ma mea lelei sa faia e lenei tama mo lona aiga, ekalesia, ma le toatele o tagata sa oo iai lana fesoasoani ao soifua ai i lenei lalolagi.
Ua faamavae atu nei le tina loto faavauvau, ma le nofoa alo, o aiga na lua, paolo ma gafa maualuluga, uo ma e masani, atoa ai ma e pele i le loto lenei tama, ina ua faamanavaina e le Atua ana galuega, a o iai i lenei lalolagi.
O le tele o molimau o le aso mulimuli o Leao, sa faamatalatala ai ma toe faamanatu e nisi o uso a auauna, susuga i faafeagaiga, aiga uo ma e masani, ni uiga tausaafia ma le loto finau tele o lea auauna i ona taimi a o tulai mai o se auauna foi a le Atua, atoa ai ma lona soifua galue i fafo atu o le galuega sa valaauina ai.
O le taeao o le Aso Lua, 29 o Setema, sa faataunuuina ai lona sauniga mulimuli, i le malumalu o le Ekalesia PIC i Avondale. Sa matua faatumulia le malumalu i le mamalu o i latou sa faatasi atu e molimauina, ma faaalia foi lo latou agaga faafetai mo le soifua auauna o lea auauna, ma faatofa atu ai mo le taimi mulimuli.
Talosia ia maliu se toa, ae toe tulai mai se isi toa, ma ia sosoo foi le fau i le fau, tulai mai nisi faapei o ia, ina ia tauaveina ma faaauau pea galuega lelei ma faataitaiga manuia sa ia luitauina ai i tatou uma, ae ia maualuga ai se viiga o lo tatou Atua.