O le amataga o le vaiaso nei na faauu ai nisi o a’oa’o fou sa a’otauina mo le galuega a le Atua.
O le susuga Tulolo ma le faletua ia Petala Kapeteni i le tofiga a’oa’o ma le tofi tiakono, faapea ma le susuga Sun ma le faletua ia Apaula Ah Sang.
O le sauniga paia sa faataunuuina i le malumalu o le Ekalesia Showers of Blessings Samoan Christian Church i East Tamaki i lalo o le taitaiga a le susuga i le taitai aoao o le ekalesia, susuga Elder Fineaso Faavae.
O se sauniga sa faatumulia i le mamalu o le Atua aemaise o le paia o le auvalaaulia ma le ekalesia.
Faaiuina ai i se taumafataga tele ma felanulanuai saunia e le faafeagaiga ma le ekalesia.
Ua atoa nei iai le toa fitu o a’oa’o poo toa o le Tala Lelei a Keriso talu ona faavaeina mai le Ekalesia ia Aperila o le tausaga ua tuanai, 2012.
O le ata manino foi lea ma vaaia o le faatuputupulaia o le galuega a le Atua ma ua atoa nei le 15 o matafale mai le toavalu sa amataina mai le galuega.
O se galuega fou ua matua faamanuiaina i le laugaina ai o le afioga Paia a le Atua aemaise o le maualuga ai o le viiga o le Atua i loto ma agaga o le mamalu o le Ekalesia.
