Mausali sootaga o faigamalo a Samoa e lua
O le faatoa toe faatino lea o se faatautoga o se Kovana ma se Lutena Kovana o le faigamalo a Amerika Samoa i se sauniga aloaia talu mai le sefulu tausaga ua mavae. O le molimau lea mai se lipoti a le tamaitai tusitala sinia, o le faatonu foi o le vaega o Tala Fou a le leitio o le KHJ le faletua o Monica Miller, o se tamaitai o Samoa o loo aumau i Amerika Samoa ae maupaolo i se alii o se tagatānuu o Amerika Samoa.
I sana faamatalaga i luga o le leitio faavaomalo a Niu Sila na ia faaalia ai, o se sauniga sa lelei ona tapena i ona vaega uma aemaise o le ava faatupu, ma le sauniga lotu.
Sa auai lana afioga i le Ao Mamalu o le Malo Tutoatasi o Samoa, afioga Tui Atua Tupua Tamasese Efi ma lana masiofo o Filifilia Tamasese, faapea le Palemia o le Malo Tutoatasi le susuga Tuilaepa Lupesoliai Sailele Malielegaoi ma lona faletua o Gillian Malielegaoi.
O se faailoga lea e pei ona faaalia o le mausali pea o sootaga o faigamalo a Samoa e lua, e ui ina eseese pulega. O le faailoga foi lea o le galulue faatasi pea o taitai o Samoa e lua e saili auala uma e ausia ai e tagata o malo e lua ni faamanuiaga i atinae o le tamaoaiga, aemaise o le faatumauina ai pea o le nonofo fealofani o tagata Samoa ma faatumau le feosiosia‘i o sootaga faaleaiga.
O le taimi muamua lenei ua suia ai se faigamalo e taitaia upufai o Amerika Samoa ina ua manumalo Lolo Matalasi Moliga ua 65 tausaga o le soifua ma Lemanu Peleti Mauga ua 53 tausaga o le soifua, i le tofi Kovana Sili ma le Lutena Kovana. O se suiga ua faailoa e Lolo o le a taumafai ai e sui le alavaa e faatino ai pulegamalo a le teritori, e ala i le ave o le faatuatuaga i soo se tagatānuu o Tutuila ma Manu‘a e tautua ai ma galulue mo le manuia o Amerika Samoa.
O se molimau faatuatuaina na ta‘ua ai, o le suiga ua silasila i ai le Kovana o Lolo Moliga ma le Lutena Kovana o Lemanu Peleti, o le tuu lea o le avanoa i soo se tagata o le teritori ua iai le tomai ma le agavaa e tauave ai le pulea o galuega a le Malo. E le o toe fia faia e le Kovana ma le Lutena Kovana taiala sa iai muamua i isi taitai ua mavae, o le tofi o tagata e lagolagoina le faigamalo ma tagata e iai sootaga faaleaiga e pulea galuega a le Malo.
O le molimau ua oo mai i le tusitala e faapea o le tasi lea o taiala sa faaaogā e pulegamalo ua tuanai na mafua ai ona aafia i ni faiga lē lelei le faaaogāina o aseta ma meatotino a le teritori e oo lava i le faaaogāina o seleni o loo sasaa mai e le Malo tele o le Iunaite Setete o Amerika.
O le faauuga ma le faatautoga o taitai o le faigamalo a Tutuila ma Manu‘a na foai ai e le Kovana ua mae‘a lona taimi, le tofa Togiola Tulafono se meaalofa tupe e selau afe mo le Malo o Samoa auā ana galuega faaleleia mai sauaga a le afa o Eveni. Na foai foi e le Kovana filifilia o Lolo Matalasi Moliga le siakitupe e 15 afe mai le suegatupe a le Koluse Mumu a Tutuila ma Manu‘a o loo avea ai o ia ma taitaifono.
I le saunoaga a le Kovana Sili filifilia na ia faafetaia ai le Ao Mamalu o le Malo Tutoatasi ma lana masiofo ona o le auai atu i le faatautoina o lana faigamalo, ma ua maualuga atili ai le faamoemoe o Amerika Samoa.
