Atoaga o le 10 tausaga talu ona Faavaeina le Mafutaga a le aiga sa talo i Niu Sila nei

O le amataga o le masina nei ua  faamanatuina ai le atoaga o le 10 tausaga talu ona faavaeina le mafutaga a le aiga Sa Talo i Niu Sila nei.

O le aso Tofi sa faapea ona fai ai le feiloaiga ma le malaga mai Samoa i le ava o le feiloaiga i le hall a St Theresa le Ekalesia Katoliko i Magele.

O le aso na sosoo ai sa faapea ona tatalaina ai loa i le taulaga paia i le Misasa i le malumalu le Ekalesia Katoliko St Theresa i Magele lava i le 10.30 i le taeao.

O le afioga ia Patele Ekenasio na taitaia le sauniga, lagolago iai ma le afioga Patele Patolo mai Samoa o nisi o lupe faalele a lenei aiga.

Na maea le taulaga paia o le Misasa ona faapea lea ona talaaao le au valaaulia ma le aiga i le hall a Malaeola mo le taumafataga sa saunia ai e le paia o le aiga.

Sa felanulanuai lenei aso i taumafa eseese ae le gata i lena o faafiafiaga su’ifefiloi na saunia lava e le aiga aua le paia i le aufaigaluega ma le au valaaulia.

TALA O LE MAFUTAGA

Na faavaeina mai le mafutaga mai le tausaga 2002 o le tausaga foi lea na sailia ai ma tofi a lenei mafutaga.

O le taitaifono Talo Sopi, sui taitaifono Togia Sefo, failautusi Ituau Semau, teutupe Luisa Muliaga.

E 11 matafale sa amata mai ai le mafutaga ma o le uluai faatasiaga 2003 sa fai i Niu Sila nei.  O le tausaga 2005 – 2006 sa faapea ona fai i Samoa le reunion.

O le taimi nei o ofisa o le mafutaga o loo iai, taitaifono Talo Sopi, sui taitaifono Tauiliili Vaa, teutupe Palepa Seumanu ma le failautusi Kalameli Tufuga.

Saunoa Talo Sopi e toe momoli le agaga faafetai i le paia o le au valaaulia sa faapea ona auai atu aua le faamanatuina le 10 tausaga talu ona faavaeina le mafutaga o lenei aiga Sa Talo i Niu Sila nei, ae maise ai o le au malaga mai Samoa.

FAAFETAI FAAFETAI TELE LAVA.