“E talitonu leoleo o ia lava na mafua ai”..Leaupepe Fatu Pula
E agi le afā o Eveni o loo i Samoa le alii o Hans Dalton 38 tausaga le matua mai Aukilani Niu Sila ma lona tuafafine. O le taulealea e faapea e aafia i le gasegase o le mafaufau.
O le aso na agi ai le afā o Eveni na leiloloa ai ana fualaau ma vai mo lona gasegase ina ua pe le eletise.
O le mafuaaga lea na o ai le alii ma lona tuafafine e vaai le fomai o le mafaufau i le maota gasegase o Tupua Tamasese Meaole i Motootua, lea na fai ai lona tui. Peitai o le molimau a lona tuafafine na vaaia ai nisi uiga o le alii ma faatonuina ai loa e le fomai e ave i le vaaiga a leoleo. Le gaioiga lea na ave ai Dalton ua tuu i se tasi o sela poo potu o le falepuipui i Tafaigata.
E faapea o le aso na sosoo ma le aso Kerisimasi na maua atu ai le alii ua maliu, ae o loo u lona ulu i lalo o se kalone vai ae u i luga ona vae (up side down).
O le faamatalaga a leoleo, e leai se isi o masalomia i le maliu o lea taulealea, ae o ia lava na faia le gaioiga na mafua ai ona maliu.
E iai le talitonuga o aafiaga o le gasegase o le mafaufau na mafua ai ona tatu‘i e lē ua maliu lona ulu i le si‘o sima o le potu poo le sela o le falepuipui sa taofia ai mo lona saogalemu.
O le mau a lona tina i se lipoti, sa tatau lava i leoleo ona fai se gaioiga e taofia ai lea tulaga. Ua mae‘a ona faia le taotoga faapitoa e sailia ai le mafuaaga o le maliu o Dalton, ma o le mae‘a o lea taotoga na ave ai lona tino maliu i lona aiga i Niu Sila. Peitai e iai se isi suesuega e faapea o le a faia i Niu Sila e toe sailia ai pea le mafuaaga o le maliu o lea alii.
E tele faamatalaga salatua ma ualesi mosooi ua salalau e faatatau i le mafuaaga o le maliu, ma ua tuuaia ai leoleo i le lē faia o lo latou tiute a o nofo ai lē ua maliu i le falepuipui i lalo o le latou vaavaaiga.
Peitai ua manino mai i le finagalo o le sui sooupu le afioga Leaupepe Fatu Pula, e leai lava se isi na aafia i le maliu ai o lea taulealea. O lona uiga o lana lava gaioiga na faia na mafua ai.
E pei ona silafia e lē o iai se nofoaga lelei e malupuipuia ai tagata e aafia i le gasegase o le mafaufau i Samoa seia vaganā le falepuipui o loo ave i ai.
O se tasi lea o fuafuaga o loo faataoto i se galuega o loo fuafua e le Malo i le lumanai, o se nofoaga mo i latou e aafia i le gasegase o le mafaufau.
O loo talosia ia vave ona faatino lea fuafuaga ina ia mafai ona iai se fale lelei e ave i ai tagata ua aafia i lea gasegase.
