Faamanuiaina le Pasefika i auaunaga ale Aiga Atia’e Pasefika Family Trust

O se tasi lenei o auaunaga mo tagata Pasefika ma o loo faaaogaina foi e nisi o atunuu e mafai ona faaoo atu iai la latou fesoasoani.

Ua savali nei i le 10 tausaga o le auaunaga ma na taua e le faauluuluga o le tamaitai pule foi lea o Taulapapa Nona S.T.Wulf, o lenei faamoemoe e mo tagata lautele o le pasefika ma o polokalame uma foi o loo faatino ua maea ona tuuina iai le ioega mai le malo.

O nei auaunaga e aofia ai tulaga faa faufautua i mataupu eseese o loo aafia ai le soifua o tagata, e aofia ai foi ma le family violence poo sauaga i aiga, o aoaoga i tiute faamatua poo aoga faamatua ma le anoanoai o isi polokalame o loo mafai ai ona fesoasoani le Trust mo tagata pasefika.

Faaalia e Taulapapa i le Samoa Times o nisi o tagata e agai atu i a latou aoaoga e tuuina mai o latou suafa mai ofisa o le malo e aofia ai foi ma le Child Youth and Family ma isi foi auaunaga e faatatau i mataupu eseese e manaomia ai le fesoasoani.

O le umi e faataunuu ai nisi o aoaoga e oo i le fa masina peitai e fua lava i le tulaga ua iai le ausia e le tagata o nei aoaoga aemaise o le faamalieina uma o tulaga tau aoaoga e manaomia.

E le totogia le auai ai o le tagata i nei polokalame faale aoaoga ma ua faailoa foi e Taulapapa e toatele lava i tagatanuu o Samoa o loo matele ina auai atu ai i polokalame fai.

O le amataga o le tausaga nei ua matala mai ai foi le avanoa mo soo se tasi e fia maua ia ituaiga fesoasoani e aotauina ai foi mo le silafia atili i nisi o auala e maua ai fesoasoani i Niu Sila nei pe afai e fou foi le soifua ai i totonu o Niu Sila pe faatoa malaga mai foi Samoa poo isi atumotu o le Pasefika.

Taua e Taulapapa e momoli le faamalo i matua na mafai ona faamaeaina le aoga o tiute faamatua ma o se luitau foi lea i nisi matua i le amataga o lenei tausaga ina ia fesoasoani ai i le tausiga o alo ma fanau i aiga aemaise foi o le tupulaga talavou.