O upu o le Tusi, e lei vaaia lava le Atua e se tasi, a tatou fealofani, ua tumau le Atua i totonu ia te i tatou, ua atoatoa foi le alofa ia te ia i totonu ia te i tatou, (1 Ioane 4:12).
E iloa le tasi o le loto pe a fealofani ma mafuta faatasi o uso, ma o se faataitaiga lea mo isi uso aoga a le ekalesia Katoliko i Samoa ina ia faaosofia ai lo latou ola tauivi ina ua mautinoa o loo amanaia i latou e nisi sa aoaoina i ia aoga i Samoa.
O le mau tauave lea na faamamafaina i saunoaga a le Afioga ia Patele Epati Tamati, sa ia taitaiina ai le sauniga o tuufaatasiga a alii ma tamaitai tuai o aoga a le Ekalesia Katoliko i Samoa ua aumau nei i Brisbane. Sa lagiina lava viiga e alii ma tamaitai tuai o nei aoga e tolu.
O se faatasiga matagofie sa faia lea i le malumalu a le Ekalesia Katoliko i Regina i Cooparoo i le faaiuga o Aperila.
O le autū moni na tālo ai lenei faatasiga, ina ia faavaeina ni asosi a alii ma tamaitai tuai o ia aoga i lenei atunuu, e mafai ai ona tali atu i se faatalauula mai a nisi o aoga a le Ekalesia i Samoa.
E tele na‘uā ni manaomia i soo se tulaga e pei ona silafia, ae faafetai i nei alii ma tamaitai tuai ua latou faavaeina nei asosi e fesoasoani ai i aoga a le ekalesia i Samoa.
Sa faatumulia i aiga o i latou nei sa molimauina lenei faamoemoe. O le a lē gata i lenei tausaga lenei faatasiga ae o le avea o se mafutaga e faaauau pea mo se lumanai manuia.
Sa faapaiaina ai ma tofi fou o nei asosi e tolu poo aoga nei e tolu, o alii ma tamaitai tuai a le kolisi a Chanel i Moamoa, le kolisi a Paul VI i Leulumoega ma le kolisi a St Marys i Vaimoso. Sa faaiuina i se iputi māmā ma fefaamasaniai ai pea alii ma tamaitai tuai ina ia tasi le loto e tali ai ma fesoasoani i manaoga e tuuina mai Samoa.
O tofi fou nei o Asosi
Chanel College:
Peresitene – William McFall
Sui Peresitene – Sala Emani Petelo
Failautusi – Pale Tagaloa Faaleaaga
Teutupe – Leaiataua Clement Curry
St Marys College
Peresitene – Agnes Feliz
Sui Peresitene – Joyita Stanley Slade
Failautusi – Foloi Fonoti-Wall
Teutupe – Pearl Apiau Tupua
Paul VI College
Peresitene – Sekolasitika Lemana-Satui
Sui Peresitene – Telesia Anamaitu-Leota
Failautusi – Rosalie Moli-Fernandez
Teutupe – Tili Fata-Tauilo
