O ituaso e taoto lelei ai aupeau, o ituaso foi e lagalaga ai le sami ma tu lili peau o le vasa, peitai o ituaso o le tulili o peau, o ituaso ia o le tautai e faatutu ai foe o le savili, auā foi e leiloa le itu e agi mai ai le matagi, ae e te mafai ona suia la o lou vaa folau.
Ua faapena le lagona i le finauina o le poto ma le atamai i totonu o soo se faleaoga, aemaise Iunivesite e pei ona faamanuiaina ai se tasi o alo o le atunuu, Ma‘ama‘a Phillip Faletanoai- Evalu i lona faauuga i le Iunivesite o Canterbury i le aso 23 o Aperila 2010.
O Ma‘ama‘a Phillip e lima tausaga o a‘otauina i lea lava Iunivesite ma ua faauuina mai i ona faailoga e lua, Bachelor of Law ma le Bachelor of Commerce in Economics, ua na o ia le alo Samoa sa faamanuiaina i lea foi faauuga o le vaitausaga.
O ona matua o Fiata Faletanoai Evalu (Faleatiu) ma lona tina o Tofamamao F. Evalu (Apai Manono) ma na faaalia mai e mātua lo la naunautaiga e unai pea lenei alii mo le faaiuina o lana mataupu, e ui ina lagona le faigata o le ola a‘oa‘oina aemaise ai o le faatupeina, peitai sa laua galulue malosi atoa ma le tuu atu i luma o le Atua i talosaga molia.
O Ma‘ama‘a e lona tolu o le fanau tama, ma ua mae‘a foi ona faauu se tasi o ona uso matua ae o loo aoga foi leisi alii i le Iunivesite mo le tau faaiuina o lana aoga, ma tulai mai ai lenei fanau o se fanau e finafinau ma lē fiu gofie e asamo le poto.
Na faaalia e lona tamā ia Fiata Evalu, le agaga fiafia ma le faafetai e faafoi i le Atua, aemaise o le tapuaiga i le faifeau Rev Lapana Faletolu ma le mamalu o le ekalesia St Pauls Pacific Trinity Church, e le gata i lea o le susuga i le faifeau na malaga mai Samoa EFKS Apai i Manono, Rev Iona Leau Paniani, lea sa auai i le sauniga matagofie o lea aso tele.
Na fesiligia e le sui o le nusipepa Ma‘ama‘a mo leisi laasaga sosoo, na ia faapea ai o loo sauni atu mo le faaulufaleina aloaia i le BAR, aemaise lana tautoga e galue ai faaloia i mataupu tau pisinisi e faamoemoe e faia i le masina o Iulai. Na ia ta‘ua foi le tele o luitau ma fita a o feagai ma le tauiviga o mataupu, na ia lagona ua tau musu ma faapalapala ae sa maualuga ia te ia le ola finau ina ia maua le taunuuga o lona faamoemoe, na ala ai ona asamo ma tigaina e aisi le poto.
O se faamalosiau foi lea mo le fanau o loo taumafai mai i soo se aoga ma soo se matata o loo aotauina ai, ia e taofimau i lou loto tauivi, loto onosai, lotonuu, loto aiga ma talitonu o loo e folau faatasi ma le faatonutonu folau, auā e gata le poto o le tagata ae faaauau e le Atua.
E avatu ai ma faamanuiaga a le tatou nusipepa i alo ma fanau uma a le atunuu ua faauuina i soo se Iunivesite i lenei vaitau o le tausaga, “Finau aua le fiu e asamo le poto”.
