E tusa lava poo fea e agai i ai faiga a tina i le faatinoina o polokalame o le latou aso, o le mea moni, afai lava sa lē faapaole ma lē faatagafaia, e mautinoa le oo ma le manogi lelei i luma o le Atua Silisili Ese.
O pese ma siva faaleagaga sa matuā faatino ai le fiafia o tina o le ekalesia EFIS i le Aso Sa o Tina na se‘i tuanai atu.
E le gata i lea a o le laugaina foi o le upu faauuina a le Atua, sa matuā aloalo lelei i ai le tina ia Miriama Alalatoa Pomare, e pei ona fai ma sui o tina, e momoli so latou sao mo le latou aso. Sa toe faaopoopo i ai le faletua o le faafeagaiga ina ia tulitatao pea le agaga o le aso e pei ona faamanatuina.
O se vaaiga matagofie tele ona o le gaioi a tina i le faatinoina o pese faitaga ma siva, aemaise foi se tala puupuu sa saga faamautuina ai le mau o lea aso.
O le susuga i le feagaiga ia Rolani sa toe faaopopo foi o ia i faamanuiaga ma se isi upu faalaeiau mo tina o le ekalesia, ona faaiu ai lea o le lotu, ae agai i le taumafataga ma le toonai sa tapenaina ma saunia e tamā o le ekalesia.
