O le tāua tele o le feau o loo taumafai le vaega a le soifua maloloina e unaia ma faamalosiau i tagata ina ia soifua i ni soifuaga maloloina, ua amatamea ai le Ekalesia Aso Fitu o le Toe Afio Mai (Koneferenise) i Papatoetoe. O le aso muamua o le masina lenei (Me 1, 2010) sa faatulaga ai e lenei ekalesia se “Aso Faapitoa” na faamamafa ai le autu: “Fua o le Soifua Maloloina ma Fua o le Agaga”
Fua o le Soifua Manuia (Fruit of Healthy Living)
Ia tatalo i aso uma, Tausami meaai paleni, faamalositino, inu le vai, saogalemu, tumamā, lava le mālōlō/moe, leai se popole, leai se asu o le tapaa.
Fua o le Agaga (Fruit of the Spirit)
Kalatia 5: 22-23
Na amata i le mālū o le taeao i le 8.00, ma na vaaia le matagofie o mea taumafa eseese, fualaau aina ma fualaau faisua ma sa iai foi ma sina koko araisa ma le suafa‘i e salagi ai le taeao, auā o taumafa masani a si o tatou atunuu. Na sosoo lea ma le sauniga o le taeao, ma na faaautu lona lesona o le “Soifua Maloloina ma lona Siosiomaga”. Na taitaiina e le faufautua o le matagaluega le susuga ia Faalavaau Konelio Uelese.
O le sauniga faapitoa o le lauga (Divine Service) sa faaautu i le mataupu na tautalagia e le ta‘ita‘i ma lana komiti i le “Vaega o le Tino e Tetee ai Faama‘i ma Fua o le Agaga”. Sa faamamafaina ai sela papae e iva o lea vaega o le tino (immune system) ma lona sootaga ma fua e iva o le agaga e pei ona i le Kalatia 5:22-23. Sa faamanatuina ai foi e le komiti i le Ekalesia le aogā o niuterane ma minerale (nutrients and minerals) e maua mai i mea tausami e pei o fualaau aina ma fualaau faisua, auā le faamalolosiina o nei sela papae e iva mo le tauina o le taua e tetee atu i siama ma faama‘i eseese e pei o le kanesa, ma‘i fatu, suka, toto maualuga ma isi. E iai sootaga o le aogā o sela taitasi ma fua taitasi o le agaga. Mo se faataitaiga: O le sela “basophil” e tetee atu i mea e le fiafia ai le tino (allergic response). Ua faatusa i ai le fua o le agaga o le “filemu”, e fifilemu, e tusa lava poo ā mea e tutupu mai – Isaia 26:3.
Na faaiuina le lauga i le faamatalaina o aogā o le “vai”. E le mafai ona galue malosi ma atoatoa vaega o le tino pe a aunoa ma le vai, pe maliu (oti) le tagata pe a leai se vai lea e (60-80%) le vai i totonu o le tino.
Ua faatusaina le vai o le Agaga Paia o le Atua, e le mafai ona galue pe ola lelei fua o le agaga pe a aunoa ma le Agaga Paia e afio i totonu o le tagata.
O le sauniga o le afiafi sa valaaulia faapitoa ai le susuga ia Tuilaepa Reupena Kovati ma ia saunoa foi i le aogā o fualaau eseese i le tino aemaise o lana taleni, o se fai faatoaga sa faasoa atu i le mamalu o le Ekalesia.
Sa faamalieina foi le toatele o i latou sa fai a latou fesili i vaega e tele sa fia malamalama ai.
O lenei Ekalesia latou te faatāuaina foi le faamalositino, ma e faalua ona faia i le vaiaso. Aso Sa, 9.00 – 10.00 (taeao) ma le Aso Lua, 6.00 – 7.00 (afiafi). O le alo lava o le Ekalesia, le faiaoga (qualified aerobic instructor) le tamaitai o Pua Faatama‘i.
E talia soo se tasi e fia auai i nei faamalositino. Ua amataina foi se togalaau‘aina (vegetable garden) i Papatoetoe, o se poloketi o loo galulue i ai se vaega o le auaunaga o le au “Ma‘i Suka”.
E faafetai ai i nisi o tina lava o le Ekalesia ua amata galueaina lea faatoaga, o “Asovale ma Asofitu Tuitea.”
O le faanaunauga o nei polokalame uma, ina ia maua le Ekalesia i le soifua manuia auā le tautuaina o aiga, nuu atunuu aemaise le auauna i le Atua ma Lona Finagalo.
E faamalo ma faafetai atu le komiti o le “Soifua Maloloina” i sui uma o le Matagaluega.
Leone Ierome Afamasaga – Taitai
Asofitu. Kiliata. Tuitea – Fesoasoani
Katie. Ierome – Failautusi
Faalavaau. Konelio. Uelese – Faufautua
E faafetai foi i le lagolagosua a le faafeagaiga – Pr. Toetu & Elei Faraimo ma le Taitai Toeaina – Faaofonuu. Viliamu & Jacinta Pati aemaise le mamalu ma le maave eseese o le Ekalesia ona ua faaiuina ma le manuia le tatou Aso Faapitoa.
E faamanuia atu foi le Aso Tina mo tina uma lava aemaise tina matutua o lenei Ekalesia ma le tina o le galuega – Elei Faraimo.
Faafetai Lava: Taitai o le Matagaluega – Leone Ierome Afamasaga
